Куорат дьокутааттара оскуолалар өрөмүөннэрин бэрэбиэркэлээтилэр

Санатар буоллахха, 2022 сылга «Модернизация школьных систем образования» федеральнай бырагыраама чэрчитинэн киин куорат 11 оскуолатыгар хапытаалынай өрөмүөн ыытыллар. Ити сыалга федеральнай, өрөспүүбүлүкэтээҕи уонна муниципальнай бүддьүөттэртэн 809 мөл. солкуобай көрүллүбүтэ.

Дьокутааттар биэс оскуолаҕа – 27-с, 10-с, 21-с, 31-с №-дээх орто оскуолаларга уонна Саха политехническэй лицейга сылдьан өрөмүөн хаачыстыбатын бэрэбиэркэлээтилэр. Кинилэр өрөмүөн үлэтэ киэҥ хабааннааҕын бэлиэтээтилэр. «Үгүс оскуолаларга иһинээҕи үлэни сэргэ эбийиэк иннин, үрдүн, канализациятын өрөмүөннүүллэр, уот ситимин, түннүктэри уларыталлар. Итинник киэҥ хабааннаах үлэ куорат оскуолаларыгар урукку өттүгэр ыытылла илик», - диэн бэлиэтээтэ Айаан Васильев.

 «Кырдьык, график быһыытынан наһаа элбэх үлэ ыытыллар. Үөрэх дьыла саҕаланыан иннинэ өрөмүөн үлэтэ түмүктэнэрэ былааннанар, балаҕан ыйыгар оҕолор өрөмүөннэммит оскуолаларга кэлиэхтэрэ», - диэн эбэн эттэ Евдокия Евсикова.

Кини бэлиэтээбитинэн, кэлэр сылга «Модернизация школьных систем образования» федеральнай бырагыраама чэрчитинэн куорат уокуругун 12 оскуолатын хапытаалынай өрөмүөнэ былааннаммыт.