Куорат баһылыга нэһилиэнньэ кыһалҕатын быһаарар

Муус уустар 20 күнүгэр куорат олохтоохторо баһылык Евгений Григорьев нэдиэлэтээҕи приемугар сырыттылар.
Нэһилиэнньэ ыйытыыларыгар СӨ Урбааҥҥа уонна туризмы сайыннарыыга миниистирин солбуйааччы Гаврил Харлампьев, ону тэҥэ куорат Олохтоох дьаһалтатыттан Дьиэ-уот сыһыаннаһыыларыгар департамент дириэктэрин быраап боппуруостарыгар солбуйааччы Светлана Иванова, Тутуу уонна тырааныспар инфраструктуратын департаменын начаалынньыгын солбуйааччы Иван Гуляев, Сир сыһыаннаһыыларыгар агентство салайааччыта Сергей Тимошенко, Баайга-дуолга уонна сир сыһыаннаһыыларыгар департамент начаалынньыгын солбуйааччы Акулина Друзьянова, Социальнай харалта управлениетын салайааччыта Семен Матвеев хоруйдаатылар.
Строд, 1, 3 уонна Ярославскай, 59 уулуссаларын олохтоохторо сирдэрин учаастагын атыылаһан ылыы уонна уу ситимин тардыы боппуруоһун туруордулар. Евгений Григорьев кинилэргэ дьиэни бас билээччилэр, бастатан туран, сир учаастагын сыаналатыахтаахтарын уонна Куораты тутууга уонна тырааныспар инфраструктуратыгар департамеҥҥа тиийиэхтээхтэрин быһаарда. Маны таһынан  баһылык Олох-дьаһах, хомунаалынай хаһаайыстыба боппуруостарыгар солбуйааччытын ыйыллыбыт аадырыстары чинчийэн, уу ситимин тардыы боппуруоһун быһаарарга сорудахтаата. 
Алексей Чернышов туруорсар боппуруостара: Саха Өрөспүүбүлүкэтигэр социальнай-үлэ уопсастыбаны, Кырдьаҕастар дьиэлэрин, олохтоох бородууксуйаны батарыы ырыынагын тэрийии.
Капиталина Коновалова олорор дьиэтин кыһалҕатынан кэлбит –  дьиэтин хаарбах туруктаах дьиэлэр испииһэктэригэр киллэртэрэн, өрөспүүбүлүкэтээҕи хаарбах дьиэттэн көһөрүү аадырыстаах бырагырааматыгар хапсыы. 
Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын ыйар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
- yakutsk@sakha.ru Олохтоох дьаһалта официальнай электроннай почтатыгар;
- 40-80-76 төлөпүөнүнэн;
- Дьокуускай к., Ленин проспега, 15 аадырыска тиийэн;
- Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).