Куорат 2-с №-дээх оскуолатыгар видеодомофон туруорулунна

Уруоктар саҕаланнылар даҕаны оскуола аана хатанар. Хойутаабыт оҕолор уонна үөрэҕирии тэрилтэтин үлэһиттэрэ видеодомофоны туһанан киирэллэр.

Оскуола салалтата уонна Төрөппүт сэбиэтэ ити миэрэни саамай сөптөөҕүнэн ааҕаллар.

Бу иннинэ Үөрэҕирии управлениетын начаалынньыга Мария Петрова 31-с уонна  2-с №-дээх орто оскуолаларга хонтуруоллуур-аһарар пуун туруоруллубутун туһунан иһитиннэрбитэ.

«Террористическай куттал суоһаабатын курдук, билиҥҥи кэмҥэ 31-с уонна 2-с №-дээх орто оскуолаларга хонтуруоллуур-аһарар пуун тутуллара былааннанар. Куорат иһигэр ити икки оскуола  «үөрэҕирии тэрилтэтигэр 1000-тан тахса оҕо биир кэмҥэ баар» диэн бастакы категорияҕа хапсаллар», - диэн турардаах Мария Петрова.

Итини таһынан, Үөрэҕирии управлениета куорат бары оскуолаларыгар, ол иһигэр чааһынайдарга, видеонан кэтээн көрүү систиэмэтин уонна «тревожнай» кнопканы туруорары былаанныыр.