Кулун тутарга туох уларыйда?
Адвокаттар гонорарданнылар
Кулун тутар 1 күнүттэн адвокат өҥөтүнэн туһанар дьон, адвокакка кэлэллэрин саҕана үптэрэ кырыымчык буоллаҕына, суут үтүө түмүктээхтик бүппүтүн кэннэ гонорар төлүөхтэрин сөп буолла. Маны “гонорар успеха” диэн ааттаатылар уонна кээмэйэ дьыала түмүгүттэн көрөн быһыллар диэн суруйаллар.
Бэлиэтээн эттэххэ, адвокаттарга гонорар административнай уонна холуобунай буруйу оҥорууга төлөммөт.
Эмтэр бэйэ-бэйэлэрин солбуйсуулара
Кулун тутартан эмтэри бэйэ-бэйэлэринэн солбуйуу систиэмэтэ дьэҥкирдик ыытыллыахтаах. Ол аата Доруобуйа харыстабылын министиэристибэтэ солбуһар кыахтаах эмтэр реестрдэрин оҥоруохтаах уонна бар дьон көрүүтүгэр таһаарыахтаах.
Бу сокуон ыарыһахтар, эмтэрэ суох буоллаҕына, аналогтары булан ылалларыгар төһүү буолуохтаах.
Харабыллар боломуочуйалара кэҥээтэ
Кулун тутар 2 күнүттэн вокзаллар, аэропортар уонна метро харабыллара, кутталлаах быһыы-майгы үөскээтэҕинэ, бэрээдэги кэһиини таһаарбат туһугар о.д.а. туһааннаах түгэннэргэ, электрошокерынан туттар бырааптаннылар.
Биллэн турар, бу тэрил киһи доруобуйатыгар содулун учуоттуохтаахтар, наада буоллаҕына, суһал көмөнү оҥорорго бэлэм буолуохтаахтар.
Этиловай испиир хонтуруола
Кулун тутар 28 күнүттэн лицензия саҥа көрүҥэ киирэр – фармацевтическай суурадаһыннары оҥорорго аналлаах этиловай испиири оҥорон таһаарыыга.
Бу испиир эми оҥорон таһаарар хампаанньа бэйэтин наадатыгар эрэ оҥоһуллуохтаах диэн чопчуланар.
«Самозанятайдарга»
Кулу тутар 28 күнүттэн “самозанятай” статустаах дьон госзакупкаларга чэпчэтиилээх кыттар кыахтаналлар. Манан самозанятайдарга дьоҕус уонна аччыгый бизнес бырааба тарҕанар буолар.
Холобур, булгуччулаах квота, өҥөлөр иһин кылгас болдьоххо бэриллэр төлөбүр, партнердаах бырагыраамаларга кыттыы киирэллэр.
Лотереяны хааччахтааһын
Кулун тутар 28 күнүттэн сыаналаах кумааҕылар ырыынактарын кыттыылаахтарын азартаах оонньуулары, лотереялары ыыталларын иһин лицензияларын былдьыыр буолуохтара.
Бу миэрэ сокуону кэһэн туран ыытыллар лотереялары уодьуганныахтаах.
Сонуннар
Ордук ааҕаллар
