Кулун тутар «кулун иһин ыстараап” ыйыгар кубулуйбут

Олохтоох дьаһалта Тыа хаһаайыстыбатыгар управлениетын чахчытынан, ааһан эрэр кулун тутар ыйга куорат уулуссаларыгар 23 сылгы бэйдиэ сылдьара бэлиэтэммит.

8 сылгы Хатаска тэриллибит быстах кэмҥэ тутар пууҥҥа тиксэриллибит. Сыл саҕаланыаҕыттан уопсайа 55 дьэллик сылгы бэлиэтэммит, ол иһигэр 16 Дьөһөгөй оҕото быстах кэмҥэ тутуллар пууҥҥа ыалдьыттаабыт. 
Тыа хаһаайыстыбатын управлениетын начаалынньыга Марат Данилов иһитиннэрбитинэн, аҥаардас кулун тутар ыйга сылгыларын бэйдиэ ыыппыт хаһаайыттарга 182 тыһ. солк. курдук ыстараап түспүт. Бэлиэтээн эттэххэ, быстах кэмҥэ тутар пууҥҥа алтынньы ыйтан хаһаайына кимэ биллибэт биир сылгы кыстаабыт. 
Санатар буоллахха, быйылгы электроннай аукцион түмүгүнэн 2023 сыл бэс ыйын 31 күнүгэр диэри тыа хаһаайыстыбатын дьэллик кыылларын көрөр-харайар анал тэрилтэнэн «Софронов Радомир Юрьевич» ИП ааттаммыта. 
Тэрилтэ сыаналара:
– кыһыҥҥы кэмҥэ, алтынньы 11 күнүттэн ыам ыйын 14 күнүгэр диэри, сууккаҕа биир төбө иһин төлөбүр – 6960 солкуобай (биир төбөнү 1 чааска көрүү-истии – 290 солкуобай);
– сайыҥҥы кэмҥэ, ыам ыйын 15 күнүттэн алтынньы 10 күнүгэр диэри, сууккаҕа биир төбө иһин төлөбүр – 5808 солкуобай, (биир төбөнү 1 чааска көрүү-истии – 242 солкуобай).