Кулун тутар 15 күнүттэн кэлэр 2025 сылга тупсарыллар эбийиэктэргэ куоластааһын саҕаланар

Б.дь. кулун тутар 15 – муус устар 30 күннэригэр эһиил, 2025 сылга, тупсарарга былааннанар эбийиэктэри быһаарар Бүтүн Арассыыйатааҕы куоластааһын ыытыллар.
Санатар буоллахха, 2019 сылтан «Куорат сиригэр нэһилиэнньэҕэ табыгастаах эйгэни тэрийии» федеральнай бырайыагынан Арассыыйа үрдүнэн 11,8 тыһыынча уопсастыбаннай туона тупсарыллан кэллэ. Онуоха «Олорор дьиэ уонна куорат эйгэтэ» национальнай бырайыак чэрчитинэн үбүлэнэр бырайыактары таларга куоластааһын ыытыллар.
Куоластааһыҥҥа 14-тэн үөһэ саастаах Арассыыйа гражданнара 14.gorodsreda.ru балаһааккаҕа киирэн, сөбүлээбит бырайыактарын талан кыттыахтарын сөп. Оттон 2025 сылга Саха сиригэр Дьокуускай куораты таһынан Томмот, Алдан, Аллараа Кураанах, Сангаар, Айхал, Чернышевскай, Беркакит, Чульман, Хаандыга, Мохсоҕоллоох, Уус Майа бөһүөлэктэрин, Дүллүкү, Үөһээ Бүлүү, Хоро, Үөдэй, Нам, Мукучу, Кэбээйи, Ленскэй, Бороҕон, Таатта, Чурапчы нэһилиэктэрин, Нерюнгри, Ленскэй, Мииринэй, Удачнай, Ньурба, Өлүөхүмэ, Покровскай, Бүлүү куораттарын бырайыактарыгар куоластыахха сөп, диэн иһитиннэрэр СӨ Ил Дарханын иһинэн Архитектура уонна куораты тутуу управлениета.