Коронавирустан оҕолоргутун харыстааҥ
Дария Федотовна Козлова – Оҕо инфекционнай балыыһатын Салгынынан бэриллэр ыарыылар отделениеларын педиатр бырааһа:
– Билигин биһиги балыыһабытыгар коронавирустаабыт 30-ча оҕо эмтэнэр. Ыарахан туруктаах оҕо диэн суох, оҕолор үксүн чэпчэкитик аһарыналлар. Балыыһаҕа атын ыарыылаах, холобур, ДЦП-лаах, тыҥа ыарыылаах оҕолору киллэрэ сатыыбыт. Төрөппүттэрэ эмиэ ыалдьыбыт буоллахтарына, ыалдьыбыт оҕону, төһө да туруга аматын иһин, атын аймах көрөрө кутталлаах, сыстыахтарын сөп, ол иһин оҕолоро балыыһаҕа киирэр.
Оҕолор коронавирустууллара үксүн дьиэ кэргэнинэн сутуллуу түмүгэр тахсар. Маай бырааһынньыктарыгар дьон аймаҕынан син биир көрсүһүүлэргэ сырытта, ол кэннэ ыарыы биллэ элбээтэ.
Чэпчэкитик аһарынар дьон дьиэлэригэр эмтэнэр буолбуттара. Ол иннинэ ыалдьыбыт оҕо барыта биһиэхэ киирэр этэ. Ол иһин балыыһаҕа коронавирустаан киирэр оҕо ахсаана биир таһымҥа турар курдук.
– Коронавирустан оҕолорбутун хайдах харыстыыбыт?
– Маныаха биир эрэ үчүгэй ньыма баар – бэйэ изоляцията. Төһө да таһырдьа дьаарбайыы көҥүллэммитин иһин, оҕолоргутун таһырдьа таһаара сатаамаҥ диэн сүбэлиэм этэ. Оҕо аҕыйах кэмҥэ таһырдьа тахсыбатаҕыттан туох да буолуо суоҕа. Оҕолоргутун эбээлэргэ-эһээлэргэ таһымаҥ – кыра дьон ыарыы сибикитэ суох эрээри, тарҕатааччы оруолун толоруохтарын сөп. Тус гигиенаны тутуһуҥ, маасканы хайаан да кэтэрдиҥ. Даачаҕа тахсыы кэмэ кэллэ, онон айылҕаҕа тахсаргытыгар бэйэҕит дьиэ иһинээҕи дьоҥҥутун эрэ кытта алтыһыҥ. Аймаҕынан көрсүһүүлэри, төрөөбүт күннэри уонна да атын бырааһынньыктары тохтото түһүҥ.
Сонуннар
Ордук ааҕаллар
