Коронавирус тарҕаныытын картата саҥардылынна

Коронавируһустаабыт өрөспүүбүлүкэ олохтоохторун кытта алтыспыт дьон Covid-19 Саха сиригэр тарҕаныытын онлайн-картатыгар араҕас өҥүнэн көстөр буоллулар. Онлайн порталга коронавирустаабыт дьон ахсаанын көрүөххэ сөп, кинилэр кыһыл оҥүнэн бэлиэтэнэллэр. Саха сирин тас өттүттэн кэлэн баран изоляцияҕа олорор дьон халлаан күөх өҥүнэн көстөллөр.

https://stopcovid19.sakha.gov.ru/

Санатан эттэххэ, Covid-19 Саха сиригэр тарҕаныытын онлайн-картатын өрөспүүбүлүкэтээҕи IT-паарка резиденэ айбыта.

Саха сиригэр эбии 7 киһи коронавирустаата. Бу туһунан Ил Дархан Айсен Николаев бүгүн, муус устар 28 күнүнээҕи брифинигэр эттэ.

6 — Дьокуускай олохтооҕо, өссө 1 киһи Хаҥалас оройуонугар ыалдьыбыт. Кини — оройуон балыыһатын үлэһитэ. Дьокуускай олохтоохторо эрдэ ыалдьыбыт дьону кытта алтыһан сыстыбыттар.

Бу иннинэ Ил Дархан Айсен Николаев олохтоохторго иһитиннэриитигэр хааччахтааһын эрэһиимэ дьон олоҕор куттал суоһаабат түгэнигэр уһулларын туһунан кэпсээбитэ.

Өрөспүүбүлүкэҕэ ураты бэлэм буолуу эрэһиимэ уонна хааччахтааһын миэрэлэрэ ылыллыбыттара 1,5 ый ааста. Ыллылыбыт миэрэлэр көмөлөрүнэн ыарыы олус тэтимнээхтик тарҕаныытын тохтотуу ситиһилиннэ диэн суһал штаб отчуоттуур. Ол эрэн күннэтэ саҥаттан саҥа түбэлтэлэр бэлиэтэнэллэрэ салҕанар. “Быраастар төһөлөөх да сыраларын уурбуттарын үрдүнэн, бу дьай өрөспүүбүлүкэбит биир олохтооҕун тыынын быста. Онон хааччахтааһын дьон олоҕор уонна доруобуйатыгар куттал суоһаабат эрэ түгэнигэр уһуллуоҕа», — диэн Айсен Николаев эттэ.

Уопсайа ыалдьыбыт киһи ахсаана 170 буолла. Ол иһигэр 3 ыарыһах ыарахан туруктаах, 25 киһи Чайанда вахтовай бөһүөлэккэ, 126 киһи балыыһаҕа сытар. 1 киһи өллө, 18 киһи үтүөрдэ.