27.10.2022 | 16:00

Коркин турнира күүрээннээх буолуоҕа

Дьокуускай “Триумф” спорт комплексыгар алтынньы 28-29 күннэригэр ССРС, РСФСР, Саха АССР үтүөлээх тренерэ, Саха АССР үтүөлээх учуутала Д.П. Коркин кэриэһигэр норуоттар икки ардыларынааҕы көҥүл тустуу турнира буолар, букатын аҕыйах хонук хаалла.
Коркин турнира күүрээннээх буолуоҕа
Ааптар: Баһылай ПОСЕЛЬСКАЙ

Уонтан тахса омук дойдутун сулустара түһүлгэҕэ тахсыахтара. Аан дойду күүстээх бөҕөстөрө, Олимпийскай оонньуулар араас солотуулаах мэтээллэрин хаһаайыннара, аан дойду, Европа, Арассыыйа чөмпүйүөннэрэ, призердара күөн көрсүөхтэрэ, албан аат былдьаһыахтара.

Састаап күүстээх. Бүгүҥҥү күҥҥэ Кавказ, Сибиир, Москва, Саха сирин, тас дойдулартан Иран, Монголия, Куба, Македония, Австралия, Польша, Индия, урукку бырааттыы өрөспүүбүлүкэлэртэн Белоруссия, Армения, Казахстан, Кыргызстан, Таджикистан бөҕөстөрө аат-ааттаан, анаан-минээн, кыайар-хотор, сүрүн бириистэри ылар сыаллаах-соруктаах кэлитэлээтилэр.

Кинилэр ортолоругар Токиотааҕы Олимпийскай оонньуу кыттыылааҕа, 23 саастаах ыччаттарга аан дойду икки төгүллээх чөмпүйүөнэ, Панамериканскай уонна Киин Американскай оонньуулар иккилии төгүллээх кыайыылааҕа Андре Рейнери Ортега 57 кг (Куба), Токиотааҕы Олимпиада боруонса мэтээлин хаһаайына, аан дойду чемпионаттарын икки төгүллээх финалиһа, Панамериканскай оонньуулар биэс төгүллээх чөмпүйүөнэ 35 саастаах Рейнерис Салас Перес 97 кг (Куба) бааллар.

Аан дойдуга саамай күүстээх бөҕөстөрдөөх, инники күөҥҥэ сылдьар Арассыыйа сүүмэрдэммит хамаандатын бөҕөстөрө, дойду бастакы нүөмэрдээх тустууктара, хаһан да буоларын курдук, бу да сырыыга кыайыыга суоттаналлар. Кинилэр ортолоругар 2021 сыллаах Токиотааҕы олимпиада финалистара, Европа чөмпүйүөнэ Магомедхабиб Кадимагомедов (Белоруссия), аан дойду икки төгүллээх чөмпүйүөнэ Заурбек Сидаков (Хотугу Осетия), Токиотааҕы Олимпиада боруонса призера, Европа үс төгүллээх чөмпүйүөнэ Артур Найфонов (Хотугу Осетия), Арассыыйа икки төгүллээх чөмпүйүөнэ, Европа чөмпүйүөнэ Исраил Касумов (Чечня), Европа чөмпүйүөнэ, Ярыгин турнирын уонна Арассыыйа күүстээхтэрин Спартакиадатын кыайыылааҕа Курбан Шираев 74 кг (Дагестан), Коркин турнирын түөрт төгүллээх кыайыылааҕа, аан дойду боруонса призера Евгений Жербаев (Бурятия), аан дойду уонна Европа чөмпүйүөнэ Загир Шахиев 70 кг (Дагестан), Арассыыйа чемпионатын уонна Ярыгин турнирын финалистара Анзор Закуев 70 кг (Кабардино-Балкария), күүстээхтэр Бүтүн Арассыыйатааҕы Спартакиадаларын уонна Ярыгин турнирын кыайыылааҕа Шамиль Мамедов 65 кг (Дагестан), аан дойду уонна Европа чөмпүйүөнэ, Арассыыйа үс төгүллээх чөмпүйүөнэ Абасгаджи Магомедов 61 кг (Дагестан),  Европа үрүҥ көмүс призера, Арассыыйа чемпионатын икки төгүллээх үрүҥ көмүс призера, Иван Поддубнай Тустууга Лигатын кыайыылааҕа Начын Монгуш 57 кг (Тыва) уо.д.а. түһүлгэни киэргэтиэхтэрэ.

Саха тустууктарыттан кыра эчэйиилэрдээх Ньургун Скрябинтан, Виктор Рассадинтан, Айаал Лазаревтан ураты уолаттарбыт бары кыттыахтара. Бэйэлэрин ыйааһыннарыгар бырааттыы Петр, Алексей Копыловтар, Лев Павлов, Арыйаан Тютрин 57 кг, Владимир Егоров, Андрей Бекренев, Артем Слепцов 61 кг, Эдуард Григорьев 65 кг, Тимур Николаев, Константин Власов 70 кг, Станислав Свинобоев 74 кг, Ньургун Сергин 92 кг, Никита Хабаров 125 кг тустуохтара. Бу уолаттарбыт дьиэлэригэр-уоттарыгар мэтээл туһугар киирсэллэригэр эрэл улахан. Улахан көбүөрдэргэ буһууну-хатыыны ааспыт, уопуттаах бөҕөстөр. Аан дойду, Европа, Арассыыйа көбүөрдэриттэн эр-биир мэтээллэри аҕалтаабыттара. Ити үөһэ ааттаталаабыт халыҥ ааттаах-суоллаах, билигин лидердии сылдьар ыалдьыт-сулустары кытта иэмнэрин-дэмнэрин үчүгэйдик билсэллэр. 

Аныгы сайдыылаах үйэбит сиэринэн толлугаһа суох Лев Павлов, Константин Капрынов, Петр Константинов, Георгий Окороков курдук ыччаттарбыт кими баҕарар кытта бурҕатыһан кэбиһиэхтэрин сөп. Күүстэринэн, түргэннэринэн баһыйтарбаттар, кыах баар.

Норуоттар икки ардыларынааҕы Д.П. Коркин турнирыгар бэлэмнэнии, тэрээһин үрдүк эппиэтинэстээхтик, кичэллээхтик бара турар. Ону турнир кыайыылаахтара уонна бириистээх миэстэлэргэ тиксибиттэр модун моонньуларыгар кэтэрдиллиэхтээх кыраһыабай мэтээллэр да туоһулууллар. Дмитрий Петрович Коркин 1976 с. Монреалтан үс Олимпийскай мэтээли аҕалары ситиспит бастыҥ иитиллээччилэрин Роман Дмитриеви, Павел Пинигини уонна Александр Иванову кытта олорор мэтириэттээх Саха Өрөспүүбүлүкэтин сүүмэрдэммит хамаандатын бэлэмниир Киин үлэһиттэринэн толкуйдаммыт, “Офсет” хампаанньанан оҥоһуллубут сэдэх уонна сиэдэрэй көстүүлээх мэтээл. Дьикти оҥоһук сүрэхтэниитин түгэнигэр улуу тренер иитиллээччилэригэр, Саха сирин аар-саарга албан аатырдыбыт бөҕөстөргө – олимпийскай чөмпүйүөн Павел Пинигиҥҥэ, Олимпиада үрүҥ көмүс призера Александр Ивановка уонна Үтүө дьулуур Оонньууларын кыайыылааҕа Василий Гоголевка билинии быһыытынан үөрүүлээх быһыыга-майгыга тэрийээччилэр үс мэтээли үһүөннэригэр эр-биир туттардылар. Аан бастаан.

Уон ыйааһын кыайыылаахтарыгар мэтээллэри, дипломнары сэргэ – 300 тыһ.солк, иккис-үһүс миэстэлэргэ тиксибиттэргэ туһааннааҕынан – 100 тыһ. солк, 50 тыһ. солк., кыайыылары ситиспит бөҕөстөр тренердэригэр 50 тыһ. солк. туттарыллыахтара. Бириистэргэ барыта 5,5 мөл. солк. көрүлүннэ. Бастыҥ бөҕөс “Үрүҥ көмүс борцовканан” наҕараадаланыаҕа, ити сүрүн бириис кимиэхэ тиксэрин тустууну көрө олорор ыалдьааччылар быһаарыахтара.

Көбүөр оргуйар олус сэргэх хапсыһыыларын көтүтүмэҥ!

Сонуннар

Ордук ааҕаллар

Николай Винокуров:  «Дойдубар этэҥҥэ эргиллэн кэллим...»
Дьон | 19.11.2022 | 18:00
Николай Винокуров: «Дойдубар этэҥҥэ эргиллэн кэллим...»
«Боотур» этэрээт байыастарын ортотугар биһиги биир дойдулаахпыт Алаһыай нэһилиэгиттэн төрүттээх Николай Винокуров баарын истэн, кэпсэтиэхпин баҕардым. Ол эрэн сэһэргэһиибин хайдах-туох саҕалыахпын тобуларбар олус ыарахан этэ. Бу үлэ, үөрэх, сайдыы, тэрээһин туһунан суруйуу, кэпсэтии буолбатах... Бу — олох, дьылҕа, тыын былдьаһыы, өлүү-сүтүү, инники олох иһин охсуһуу туһунан сэһэргэһии. Николай тута хоруйдаабытыгар...
Халбаакыттан — Олоҥхо тыйаатырыгар
Дьон | 25.11.2022 | 10:20
Халбаакыттан — Олоҥхо тыйаатырыгар
Дьокуускайга саха тылын учууталларын сийиэстэрин сэргэ өрөспүүбүлүкэтээҕи Олоҥхо декадата ыытылла турар. Оттон чулуу айымньыбыт баай философиятын кэлэр ыччакка тиэрдэр биир бэртээхэй ньыманан тыйаатыр буолар. Бу дьыл сэтинньитигэр Олоҥхо тыйаатыра «Дьорҕостой Бэргэн» куукуланан испэктээк туруоран сүрэхтээбитэ. Режиссер Гаврил Мэҥкээрэп Николай Калинович Шамаев-Чопчухаан (Үөһээ Бүлүү) олоҥхотунан туруоруутун Дьокуускай куорат хас да уһуйааныгар...
Мария Матвеева:  «Дьоҥҥо үтүөнэн эрэ сырыттахха, олорорго чэпчэки»
Дьон | 26.11.2022 | 10:00
Мария Матвеева: «Дьоҥҥо үтүөнэн эрэ сырыттахха, олорорго чэпчэки»
Тыа сиригэр көмүс куоластаахтар, үҥкүүһүттэр, айар, суруйар дьон баалларын куруук кэрэхсии, сэргии истэбит. Ханна да сырыттарбын талааннаах дьону кытта билсэрбин, санаа атастаһарбын туохтааҕар да ордоробун.
Элэгэнтэй Адамов:  «Сиэрдээх өй-санаа төрүт дьарыкка эрэ баар»
Дьон | 20.11.2022 | 11:00
Элэгэнтэй Адамов: «Сиэрдээх өй-санаа төрүт дьарыкка эрэ баар»
Бүгүҥҥү нүөмэргэ Чурапчы улууһун Чакыр нэһилиэгин олохтооҕо Элэгэнтэй Адамовы кытта тыа сирин олоҕун, итэҕэл, уус идэтин, сайдыы, норуот дьылҕатын, кэскилин туһунан сэһэргэстибит. Дьоҕурдаах киһи анаарыыта киэҥэ, этэр тыла оруннааҕа сөхтөрдө.