Ким көтүрүөхтээх баҕайытай?

Автовокзалтан чугас олорор буоламмын, уонна биир үксүн онон хааман иһэммин халтарыйан охтон, хараҕым вокзал иннигэр тутуллубут быстах хахха тутууттан арахпат. Урукку “1000 мелочей” маҕаһыын оннугар тутуллубут саҥа торговай комплекс тутуллан бүппүтэ син хас да сыл буолла да, тутулларын саҕана оҥоһуллубут, дьон сылдьар холлороон хаххата, күн бүгүнүгэр диэри көтүрүллүбэккэ турар. Хас саас, күһүн аайы ол холлороон үрдүн хаара ууллан түһэн, күлүө сиргэ, холлорооҥҥо, килэччи тоҥон хаалар. Ону эдэр ыччат хатыыскалаан өссө шлифовкалаан биэрбитигэр, мин эрэ буолуо дуо, охтубут киһи элбэҕэ буолуо. Аттыгар автобус тохтобула баар буолан, манан кэлэ-бара ааһаччы элбэх, холлороон сылдьарга да кыбычаан.

 Кыахтаах буолан баран, маны көтүрэр киһи, дьон төһө эрэ абыраныа этэй? Тутааччылар объектарын комиссияҕа туттаралларыгар быстах кэмҥэ туппут хаххаларын көтүрэллэрин тоҕо ирдээбэт бэйэлэрэй? Куорат көстүүтүн наһаа тупсарбат тутуу курдук көрөбүн. Тутааччылар туппут дьиэлэрин иннэ, фасада кыраһыабай, тупсаҕай көстүүлээх буоларыгар интэриэстэрэ суох быһыылаах...

Кэнники кэмҥэ Дьокуускайга тутуу балысхан тэтимнээхтик барар, бу автовокзал иннинээҕи тутуллубут объекка эрэ буолбатах, атын да сирдэргэ тутааччылар көтүрбэккэ эрэ барбыт быстах хахха тутуулара элбэх. Бу быстах кэмҥэ тутуллубут тутуулар куорат тас көстүүтүн тупсарбаттара биллэр. Маны куорат архитектордара дуу, атын эппиэтинэстээх үлэһиттэрэ дуу, көрбөт баҕайылара дуу, тоҕо ким да кыһаммат боппуруоһай?

 С. Нафанаилов, уус Алдан, Кэптэни.

Светлана Николаевна Павлова  - Октябрьскай уокурук управатын салайааччытын солбуйааччы:

– “1000 мелочей” атыы-эргиэн киинин дьиэтэ тутуллан бүтэ илик. Билигин бу дьиэ “недострой” быһыытынан турар, ол аата үлэҕэ киирэ илик, ситэтэ суох. Ол иһин тутууну хаххалыыр, дьон сылдьар сиригэр тутуллубут тротуар билигин да көтүрүллүбэккэ турар. Дьиҥэ бу былырыын киириэхтээх тутуу этэ, туохтара эрэ кыаллыбакка быйылгы сылга көспүтэ.

“1000 мелочей” атыы-эргиэн киинин тутар “РОСТ-строй” ХЭТ (Сал. Л.И.Верхотуров)  төлөпүөнэ арахса сылдьар. 2019 сыллаахха “РОСТ-строй” ХЭТ моҥкуруукка барар дьыалатын суут көрбүтүн туһунан информация аһаҕас источниктарга суруллар.

Санатан эттэххэ, "1000 мелочей" атыы-эргиэн киинин тутуу 2010 сыллаахтан саҕаламмыта. Барыта 56 дольщик кыттыгастааҕа биллэр.