Киин уокурукка сылаас тохтобул оҥоһуллар

Киин уокурук территориятыгар «Куттала суох, хаачыстыбалаах суоллар» национальнай бырайыак чэрчитинэн Ленин проспегын хапытаалынай өрөмүөнүн бастакы түһүмэҕэ ыытылынна, Щорс күөлүн кытыытынааҕы уулуссалар өрөмүөннэннилэр, 2022 сылга Поярков уулуссатын өрөмүөнэ саҕаланна. Быйыл Ленин проспегын хапытаалынай өрөмүөнүн иккис түһүмэҕэ салҕанара уонна Поярков уулуссатын өрөмүөнэ түмүктэнэрэ былааннанар.

Өрөспүүбүлүкэтээҕи хаарбах туруктаах дьиэттэн көһөрүү аадырыстаах бырагырааматынан  2 кыбартыыраттан 8 гражданин көһөрүлүннэ.  Лермонтов уул., 35, 35/2, 35/3, П. Алексеев уул., 63 нүөмэрдээх дьиэлэрэ көтүрүлүннүлэр. Быйыл 19 кыбартыыраттан 64 гражданин көһөрүллэрэ былааннанар.

«Үөрэҕирии» национальнай бырайыак көмөтүнэн 36-с  №-дээх «Надежда» оскуолаҕа, итиэннэ А. Г. уонна Н. К. Чиряевтар ааттарынан национальнай гимназияҕа өрөмүөн ыытылынна. 5-с №-дээх оскуолаҕа 274 миэстэлээх салҕааһын тутулунна уонна 26-с №-дээх оскуолаҕа эмиэ салҕааһын тутуута саҕаланна. 2023 сылга икки оскуолаҕа, Саха гимназияҕа уонна икки оҕо уһуйааннарыгар хапытаалынай өрөмүөн ыытыллара былааннанар.

Киин уокурук олохтоохторун көрдөһүүлэринэн «Кинотеатр Центральный» тохтобулга быйыл сылаас тохтобул туруоруллуоҕа. Көрсүһүүгэ олохтоохтортон сүнньүнэн сокуоннайа суох туруоруллубут тимир гараастарга, куораты көҕөрдүүгэ, тиэргэннэри тупсарыыга, оҕо балаһааккаларын өрөмүөннээһиҥҥэ, оптуобустар графиктарыгар, сылаас тохтобулларга, оскуолалар тастарыгар баар алкотуочукаларга сыһыаннаах ыйытыктар киирдилэр.