Киин куорат «ЗаБег.РФ» сүүрүүгэ көхтөөх кыттыыны ылла

Бэҕэһээ, бэс ыйын 4 күнүгэр, Арассыыйа 85 куоратыгар быйыл сэттис сылын ыытыллар «ЗаБег.РФ» сүүрүүгэ Дьокуускай куоракка 800 сүүрүк кытынна – идэтийбит спортсменнар уонна сүүрүүнү таптааччылар. Сүүрүү 4 дистанцияҕа ыытылынна – 1 км, 5 км, 10 км уонна 21,1 км.
Сүүрүүнү үөрүүлээхтик түмүктүүр тэрээһиҥҥэ спорт миниистирэ Леонид Спиридонов, куорат баһылыгын эбээһинэһин толорооччу Георгий Гаврильев, «ЗаБег.РФ» Дьокуускай куоракка тэрийээччитэ уонна бэрэстэбиитэлэ Кристина Чупикова уонна Бүтүн Арассыыйатааҕы полумарафон амбассадора Сардана Трофимова кыттыыны ыллылар.
Санатар буоллахха, «ЗаБег.РФ» генеральнай спонсорынан бэһис сылын «ПСБ» баан буоларынан, дойду үрдүнэн баан 5000 үлэһитэ сүүрүүгэ кыттыбыт уонна 5 км дистанция «ПСБ 5 км» диэн ааттаммыт.
«ЗаБег.РФ» үгэһинэн сыл аайы бастыҥ көрдөрүүлээх куорат сүүрүү киининэн ананар, ол курдук: 2017 уонна 2018 сылларга Казань куорат ааттаммыта, 2019 – Владивосток, 2020 уонна 2022 сылларга – Аллараа Новгород, 2021 – Санкт-Петербург. Кыайыылаах куорат ааспыт сыллардааҕы кыайыылаахтар ааттара суруктаах көһө сылдьар Кубогынан бэлиэтэнэр.
Быйыл аан бастаан тас дойдулар кыттаннар, сүүрүү географията кэҥээбит: Кытай, Армения, Белоруссия, Таджикистан уонна Киргизия. Тас дойдуларга сүүрүү «OneRun» диэн аатынан ыытыллыбыт. Инньэ гынан сүүрүү уопсайа 160 000 кыттааччылаах буолан ааспыт.