Киин куорат VIII-с «Азия оҕолоругар» бэлэмнэнэр

Дьокуускай куоракка бу сайын бэс ыйын 26 - от ыйын 6 күннэригэр буолаары турар VIII-с «Азия оҕолоро» Норуоттар икки ардыларынааҕы спортивнай оонньуулары тэрийэр хамыыһыйа уочараттаах мунньаҕын баһылык Евгений Григорьев кулун тутар 26 күнүгэр ыытта.
Бэлиэтээн эттэххэ, өрөспүүбүлүкэ таһымнаах эбийиэктэри сэргэ Оонньууларга анаан киин куорат тэрилтэлэрин бэлэмниир сорук турар – Дьокуускай куорат национальнай гимназията, Ф.И. Авдеева аатынан Оҕо айымньытын дьиэтэ, «Стрех» спорт комплекса уонна Сайсары уокуругар саҥа тутуллар элбэх функциялаах спорт комплекса. Маны сэргэ дьарыктар ыытыллар эбийиэктэрэ – 39 №-дээх орто оскуола уонна 4 №-дээх оҕо спорт оскуолата. 
Хамыыһыйа мунньаҕа сүрүн болҕомтотун эбийиэктэри ЧОПтарынан хааччыйыы борпуруоһугар уурда уонна Евгений Григорьев сэрэхтээх буолууну хааччыйыыга туһунан мунньаҕы ыытарга этии киллэрдэ.
Сэрэхтээх буолууну хааччыйыы боппуруоһугар Куорат дууматын бэрэссэдээтэлин солбуйааччы Евдокия Евсикова эмиэ тус санаатын эттэ: «Эбийиэктэри өрөмүөннүүр бэдэрээттээх тэрилтэлэр вентиляцияҕа, баһаартан сэрэхтээх буолууну хааччыйыыга болҕомтолорун ууруохтарын наада. Тутуу матырыйаалларын уокка умайар хаачыстыбаларыгар эмиэ болҕомто ууруллуохтаах».
Мунньах кыттыылаахтара маны сэргэ Оонньуулар кэмнэригэр ыалдьыттарга уонна нэһилиэнньэҕэ оҥоһуллар уопсастыбаннай аһылык өҥөтүн дьүүллэстилэр.
Санатар буоллахха, «Азия оҕолоро» Норуоттар икки ардыларынааҕы оонньууларга анаан Дьокуускай куоракка Сайсары оройуонугар элбэх функциялаах спорт комплекса, Хатас нэһилиэгэр спорт комплекса үлэҕэ киирдилэр. Маны сэргэ спорт 14 эбийиэгэр өрөмүөн ыытыллар – «Кыайыы 50 сыла» спорт дыбарыаһа, «Триумф», «Дохсун», «Модун» комплекстар, «Эллэй Боотур» муус дыбарыаһа, «Чолбон», «Самородок» бассейннар, Н.Н. Тарскай аатынан «Туймаада» стадион, Р.М. Дмитриев аатынан Олимпийскай солбук училищета о.д.а.
Быйылгы VIII-с Оонньууларга 14 судаарыстыба уонна Арассыыйа 5 регионун эдэр спортсменнара спорт 24 көрүҥэр кыттыыны ылыахтара, диэн иһитиннэрэр Олохтоох дьаһалта пресс-сулууспата.