Киин куоракка тыа хаһаайыстыбатын дьаарбаҥката тэриллиэҕэ

Үтүө үгэс быһыытынан, балаҕан ыйын 25-26 күннэригэр, киин куоракка "Продовольствие-2021" тыа хаһаайыстыбатын бородууксуйатын дьаарбаҥката үс сиринэн тэриллиэҕэ. Ол туһунан тыа хаһаайыстыбатын Министиэристибэтин пресс-сулууспата иһитиннэрдэ.
Коронавирус инфекциятын хааччахтарынан, элбэх киһини муспат сыалтан, тэрийээччилэр дьаарбаҥканы үс сиринэн ыытарга быһаарыммыттар – АГАТУ (уруккута Тыа хаһаайыстыбатын академията) тиэргэнигэр, олохтоохтор сөбүлээн сылдьар сирдэригэр – "Аччыгый базарга" (Киров уул. 12/1) уонна  порт оройуонугар Юрий Гагарин аатынан култуура киинин иннигэр (Можайскай уул., 25).
"Якутские продукты" тыа хаһаайыстыбатын потребительскай кооператива тэрийээччи быһыытынан Роспотребнадзортан дьаарбаҥканы тэрийэргэ көҥүлү ылбыт. Быйылгы дьаарбаҥкаҕа 60 эрэ кыттааччы сайаапканы биэрбит. 
Кыттааччылар истэригэр Дьокуускайтан, Амма, Нам, Таатта, Мэҥэ Хаҥалас, Уус-Алдан, Хаҥалас улуустарыттан, ыраах сиртэн – Усуйаанаттан, Булуҥтан тыа хаһаайыстыбатын оҥорон таһаарааччылара бааллар. Дьаарбаҥкаҕа куорат олохтоохторо сибиэһэй бородууксуйаны – эти, балыгы, үрүҥ аһы, мүөтү, бурдук ас эгэлгэтин, сир уонна оҕуруот аһын арааһын, ону сэргэ норуот маастардарын оҥоһуктарын атыылаһар кыахтаныахтара.