Киин куоракка — Сайылык күнэ

Куорат олохтоохторун уонна ыалдьыттарын Дьокуускай баһылыга Евгений Григорьев эҕэрдэлээтэ.

4 араас хайысхалаах балаһаакка үлэлээтэ. “Саха мааны таҥаһа” балаһааккаҕа атыыны-эргиэни сэргэ саха таҥаһын быыстапката тэриллэн, дьон болҕомтотун тарта.

"Саха төрүт оонньуулара" балаһааккаҕа көхтөөх оонньуулар, күөн күрэстэр, спорт национальнай көрүҥнэригэр тэтимнээх күрэхтэһиилэр, норуот үгэс буолбут көрдөөх оонньуулара ыытылыннылар.

“Байанай түһүлгэтигэр” ордук эр дьон, бултка тардыһар күүстээх аҥаардар интэриэһиргээн тоҕуорустулар.

«Сайылык» балаһааккаҕа ыалдьыттар бэлэмнэммит декорацияҕа хаартыскаҕа хатаннылар. Маны тэҥэ кинигэ быыстапката уонна кырачааннарга араас маастар-кылаастар буолан аастылар.

Сүрүн сыанаҕа уус-уран кэлэктииптэр күүстэринэн «Аламай күнүнэн!» бырааһынньыктааҕы сахалыы тыыннаах кэнсиэр буолла.

Бырааһынньык «Күөххэ үктэнии» сиэрин-туомун толоруунан уонна «Самаан сайын» диэн саха эстрадатын сулустарын кэнсиэринэн түмүктэннэ.