Киин куоракка «Казанскай» сквер уонна Муса Джалиль пааматынньыга аһылыннылар

Дьокуускайга, алтынньы 31 күнүгэр, «Казанскай» сквер аһылынна уонна татаар улуу поэта, буойун, Сэбиэскэй Сойуус Героя Муса Джалиль пааматынньыга туруорулунна диэн Өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрдэ. Сквер Дьокуускайдааҕы художественнай училище учаастагар баар.

Үөрүүлээх тэрээһиҥҥэ премьер-миниистир солбуйааччыта, аан дойдутааҕы Татаардар конгресстарын национальнай сэбиэтин бэрэссэдээтэлэ Василь Шайхразиев салайааччылаах делегация кытынна.

«Бу күннэргэ, хаһааҥҥытааҕар даҕаны ордук, национальнай лидербит, Арассыыйа бэрэсидьиэнэ Владимир Владимирович Путин тула түмүстүбүт. Бүгүн Сэбиэскэй Сойуус улуу уола, Сэбиэскэй Сойуус Героя Муса Джалиль пааматынньыгын арыйдыбыт. Кини «Я песни посвятил своей стране, жизнь отдам своему народу» хоһоонун тылларын саныыбыт. Билигин уолаттарбыт анал байыаннай эпэрээссийэҕэ эмиэ итинник сарсыҥҥы дьолбут, кэскилбит, оҕолорбут уонна сиэннэрбит эйэлээх-иллээх сиргэ олороллорун, бэйэлэрин устуоруйаларынан киэн тутталларын курдук кытталлар», - диэтэ Василь Шайхразиев.

Кини Айсен Николаев уонна Рустама Минниханов икки өрөспүүбүлүкэ бииргэ үлэлэһэллэрин сайыннарыыга, Татарстан уонна Саха сирин норуоттара доҕордоһууларын бөҕөргөтүүгэ сүҥкэн кылааттарын киллэрэллэрин бэлиэтээтэ.

«Саха сирэ Татарстан Өрөспүүбүлүкэтин, норуотун кытта уруккуттан сылаас сыһыаннаахтар. «Туган Як» уопсастабыннай тэрилтэ көҕүлээһининэн, Татарстан уонна Саха сирин салалталарын өйөбүлүнэн «Казанскай» сквери арыйыы – ити Саха сирэ атаҕар турар устуоруйатыгар чаҕылхай суолларын хаалларбыт, аныгы Саха сирин сайдыытыгар кылааттарын киллэрбит татаар норуотун бэрэстэбиитэллэригэр өйдөбүнньүк бэлиэтэ. Кэлэр өттүгэр бииргэ үлэлээһиммитин сайыннарарга туһуламмыт өссө элбэх, интириэһинэй уопсай бырайыактар баар буолалларыгар эрэнэбин», - диэтэ СӨ бырабыыталыстыбатын бэрэссэдээтэлин солбуйааччы Сергей Местников.

Сквергэ култуурунай, сырдатар уонна маассабай тэрээһиннэр ыытыллыахтара.