Кэрэни кэрэхсээҥ, үтүөнү үксэтиҥ

Киин куораппытыгар уокуруктарынан көҕөрдүү уонна тупсарыы үлэтэ былааннаахтык ыытыллар.

Губинскай уокурук олохтооҕо пенсионерка Татьяна Константиновна  Наумова 13-с сылын олорор дьиэтин балконун уонна дьоҕус олбуорун араас өҥнөөх кэрэчээн сибэккилэринэн киэргэтэр, оту-маһы үүннэрэр. Сэбиэскэй саҕана тутуллубут Хабаров уулуссатын 19 №-гэр түөрт этээстээх “хрущевка” дьиэ таһа хараҕы манньытар, сүрэҕи сылаанньытар маннык кыраһыабай, кэрэ көстүүнү ааһан иһэр дьон үксэ сонургуу көрөр.

Мин эмиэ бу дьиэ аттынан ааһан иһэн, тохтоон ылан, сэҥээрэ көрөбүн. Аҕа саастаах ытык дьоммут күүстээх санаалаахтарын, ылсыбыттарын тиһэҕэр диэри тиэрдэр үтүө холобурдарыттан сөҕөбүн. Татьяна Константиновна куоракка ыытыллар куонкурустарга көхтөөхтүк кыттар. Кини 2008 сылтан сибэкки олордон саҕалаабыт. Онтон устунан бу дьарыгын сөбүлээн, сылын аайы үтүө үгэскэ кубулуппут. Манна бааллар мастан кыһыллан оҥоһуллубут остуоруйа дойдутун геройдара. Көрөргө астык. Биэс сыл анараа өттүгэр Губинскай уокурук управата үүнээйини олордоругар сибиэһэй хара буорунан көмөлөспүт. Онтон олохтоох салайар хампаанньа үүнээйилэригэр уу кутарыгар анаан  уу турбата киллэрбит. Кэрэ көстүүлээх олбуор хаһаайката саас аайы бэйэтин биэнсийэтинэн сибэкки, үүнээйи арааһын атыылаһан олордор. Олбуор тимир эрэһээҥкинэн күрүөлэммит. Салгыы хаартыскалары көрөҥҥүт, дууһаҕыт сылааһынан илгийдин.