«Кэлэр кэм дипломата» өрөспүүбүлүкэтээҕи XVII куонкурус ыытыллар

Куонкурус сүрүн сыала – ыччаты патриотическай тыыҥҥа, көхтөөх гражданскай көрүүгэ иитии, РФ тас бэлиитикэҕэ ыытар үлэтигэр, норуоттар икки ардыларынааҕы сыһыаннарыгар болҕомтону ууруу.

«Кэлэр кэм дипломата» куонкурус үс түһүмэҕинэн ыытыллар: оскуолатааҕы, улуустааҕы уонна өрөспүүбүлүкэтээҕи. Улуустааҕы түһүмэх кэнниттэн улахан лигаҕа финалга 36, алын лигаҕа 19 үөрэнээччи киирдэ. Финалга эссе түмүгүнэн киирдилэр.

Өрөспүүбүлүкэ түһүмэҕэр 23 улуустан уонна Дьокуускай куораттан уопсайа 136 эссе киирдэ.

Түмүктүүр түһүмэххэ үөрэтэр семинардар, лекциялар, психологическай тренинг ыытыллыахтара, оҕолор эсселэрин билиһиннэриэхтэрэ, нуучча уонна омук тылларынан сэһэргэһиини ааһыахтара, дебаттар, оратордар искусстволарыгар куонкурус буолуоҕа.

Эссени билиһиннэрии, омук тылынан кэпсэтии уонна дебат түмүгүнэн 15 бастыҥ кыттааччы быһаарыллыаҕа. Кинилэр финал түмүктүүр түһүмэҕэр – оратордар куонкурустарыгар киириэхтэрэ.

Куонкурус муҥутуур кыайыылааҕа өрөспүүбүлүкэ бүддьүөтүн суотугар Арассыыйа Тас дьыалаларга  министиэристибэтин дипломатическай академиятыгар бакалавриакка үөрэнэргэ тус сыаллаах миэстэҕэ тиксиэҕэ.

Билиҥҥи кэмҥэ Саха сириттэн Дипломатическай академияны 10-тан тахса киһи бүтэрбитэ уонна үөрэнэ сылдьар. Ону тэҥэ тас дойдуларга Арассыыйа дипломатическай тэрилтэтигэр үлэлии сылдьааччылар бааллар. Урукку сылларга куонкуруска кыттыбыт, финалга тахсыбыт дьонтон өрөспүүбүлүкэҕэ уонна Саха сирин тас өттүгэр норуоттар икки ардыларынааҕы сыһыаннаһыыны кытта сибээстээх үөрэх араас эйгэтигэр үлэлиир, үөрэнэр дьон элбэхтэр.

Сүрүн наҕарааданы таһынан СӨ Тас сибээскэ уонна норуоттар дьыалаларыгар министиэристибэтэ Александр Мигалкин аатынан уонна Дьокуускай куоракка РФ Тас дьыалаларын министиэристибэтин бэрэстэбиитэлистибэтэ Виталий Артамонов аатынан бириистэри туттарыахтара.

Улахан кылаас үөрэнээччилэригэр анаан «Кэлэр кэм дипломата» өрөспүүбүлүкэтээҕи куонкурус 2007 сыллаахха тэриллибитэ. Маҥнай куонкурус 9-11 кылаас үөрэнээччилэригэр анаан ыытыллара, оттон 2017 сылтан улахан лигаҕа (9-11-с кылаас) уонна алын лигаҕа (7-8 кылаас) буолар. Былырыыҥҥыттан төрөппүттэр уонна учууталлар көрдөһүүлэринэн алын лигаҕа 5-6 кылаас үөрэнээччилэрин эмиэ киллэрдилэр.