Кангалаас бөһүөлэгэр 100 миэстэлээх Сынньалаҥ киинэ тутуллуоҕа

Кангалаас бөһүөлэгин нэһилиэнньэтин иннигэр Олохтоох дьаһалта 2023 сыллааҕы үлэтин иитинэн отчуоту куорат баһылыгын хаһаайыстыба боппуруостарыгар солбуйааччы Егор Кардашевскай оҥордо.
Егор Кардашевскай сүрүн болҕомтону дойду баһылыга Владимир Путин өйөбүлүнэн олоххо киллэриллэр маастар-былааҥҥа, Үс сыллаах тупсарыы түмүктэригэр, национальнай бырайыактарга уурда.
2023 сылга чуолаан Кангалаас бөһүөлэгэр Ольховая уулуссаҕа 1,3 км усталаах аспаал ууруллубут, Севернай уулуссаҕа уот тардыллыбыт, Комсомольская, 10 аадырыска тиэргини тупсарыы ыытыллыбыт. 
Быйыл нэһилиэккэ муоста уонна Капитоновка бөһүөлэгэр Заречная уулусса хапытаалынай өрөмүөнэ былааннаналлар, Ольховая уулуссаны оҥоруу салҕанар. Маны сэргэ Ленин уулуссатыгар саҥа муоста тутуллаары турар.
Бөдөҥ эбийиэктэртэн 100 миэстэлээх Сынньалаҥ киинин тутуу саҕаланар, Нагорнай ууулуссаҕа олохтоох көҕүлээһиннэр бырагыраамаларынан Ыччат скверин бырайыага оҥоһуллуохтаах. 
Оттон 2030 сылга диэри куорат маастар-былаанын олоххо киллэрии чэрчитинэн «Суперкампус» диэн орто анал үөрэхтэр үөрэнэр-производственнай комплекстара тутуллуоҕа.
Отчуот кэнниттэн олохтоохтор олох-дьаһах хаһаайыстыбатыгар, социальнай эбийиэктэри тутууга, хаарбах дьиэттэн көһөрүүгэ сыһыаннаах ыйытыылары биэрдилэр.