Көҕөрдүү үлэтэ тэтимирэр

Тапталлаах куораппыт киин болуоссаттарыгар, сынньанар сирдэргэ, тэрилтэлэр иннилэригэр дьэрэкээн өҥнөөх сибэккилэр, силигилии үүммүт мас арааһа дьон-сэргэ хараҕын сымнатыахтара, кэрэ көстүүнү бэлэхтиэхтэрэ.

Ааспыт сылы санаан ыллахха, былырыын Дьокуускай куораты тупсарыы уонна көҕөрдүү үлэтигэр бүддьүөттэн 3 мөлүйүөн суумалаах үп көрүллүбүтэ. Манна кэккэ улахан эбийиэктэргэ, ол курдук „Солдат Туймаады“ , “Московская набережная памяти Георгия Победоносца” сквердэргэ сүрүн болҕомто ууруллубута. Инникитин куорат ис-тас көстүүтүн тупсарарга хаачыстыбалаах, сонун композициялар оҥоһуллан, олохтоохтор сүргэлэрин бу да сырыыга көтөҕүөхтэрэ дии саныыбын. Ол курдук, аныгы “европейскай” истииллээх бырайыак оҥоһуллан, олоххо киирдэҕинэ, дьикти кэрэ көстүүлэр куораппытын киэргэтиэхтэрэ.

Ида Ивановна Петрова, Дьокуускай куорат дьаһалтатын Тас тупсарыы үлэтин хонтуруоллуур отдел начаалынньыга:

– Бу күннэргэ куораты көҕөрдүү үлэтэ тэтимнээхтик саҕаланан эрэр. Куорат бүддьүөтүттэн бу тэрээһиҥҥэ  4,3 мөлүйүөн кэриҥэ үп көрүлүннэ. АО «Якутдорстрой» киин болуоссаттары, сквердэри көҕөрдүү үлэтин саҕалаата.

Уопсайа 20 675 сибэкки арассаадата олордуллара былааннанар:

-  Орджоникидзе болуоссатыгар – 8050

-  “Солдат Туймаады” сквергэ – 6625

-  Кыайыы болуоссатыгар – 5375

- «Московская набережная Георгия Победоносца»  сквергэ – 625

- Ийэ скверигэр – 40 мас, 83 кустарник олордуллуоҕа.

Уокуруктар, куорат таһынааҕы бөһүөлэктэр территорияларыгар уопсайа 214 480 сибэкки, 4569 мас уонна кустарник олордуллара былааннанар. Манна куорат бүддьүөтүттэн 8,2 мөлүйүөн үп  көрүлүннэ.