«Көр, бу Арассыыйа!» оскуола оҕолорун күрэҕэ саҕаланна

Алтынньы 17 күнүгэр «Көр, бу Арассыыйа!» оскуола оҕолорун күрэҕин саҥа сезона саҕаланна, бырайыак төрдүс төгүлүн ыытыллар диэн Өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрдэ.

Күрэххэ сылын аайы 27 тыһыынчаттан тахса үөрэнээччи кыттар. Быйылгы куонкурус тиэмэтэ – «Мин дойдум. Мин историям». Эдэр блогердар ийэ дойдуларын историятыгар бэлиэ суолу хаалларбыт чаҕылхай дьон, чахчылар, ситиһиилэр тустарынан  видеоролик уһулаллар. 

Күрэххэ регистрацияланыы алтынньы 17 күнүттэн сэтинньи 19 күнүгэр диэри https://lookitsrussia.ru/registratsiya/ порталга ыытыллар. Видеороликтары ылыы алтынньы  23 күнүгэр саҕаланар. Аһаҕас куоластааһын түмүгүнэн кыайыылаахтар сыаналаах бириистэринэн наҕараадаланыахтара. Күрэх сонуннарын https://lookitsrussia.ru/ сайтка ааҕыахха сөп.

«Көр, бу Арассыыйа!» күрэх аан бастакы төгүлүн 2020 сыллаахха оҕо хамсааһыннарын көхтөөх кыттыылаахтарын көҕүлээһиннэринэн тэриллибитэ. Бырайыагы Саха сирин Ил Дархана, РФ Үөрэҕириитин министиэристибтэ уонна ыччат тэрилтэлэрэ өйүүллэр.