КҮННЭЭҔИ ЭРЭСИИМ – ОҔО ДОРУОБУЙАТЫН СҮРҮН ТИРЭҔЭ

Оҕо доруобуйатыгар саамай улахан оруолу күннээҕи эрэсиими сааһылааһын ылар. 3 сааһыгар диэри оҕо эрэсиимэ хаста да уларыйар.

Күнэ сааһыламмыт оҕо уһуйааҥҥа кэлэн чэпчэкитик үөрэнэр. Дьиэтигэр күнэ сааһыламматах оҕо уһуйааҥҥа кэлэн ытыыра элбиир, кэлэктиипкэ сатаан киирэн биэрбэт, ол иһин устунан элбэхтик ыалдьар, уһуйааныгар сылдьыан баҕарбат буолар.

Сөптөөх эрэсиими тутуһуннара үөрэтэргэ өрөбүл диэн суох буолуохтаах. Улахан киһи курдук оҕо хойукка диэри утуйбакка сылдьара эбэтэр күнүскүгэ диэри утуйара сыыһа. Эрэсиимэ кэһиллибит оҕо саастыылаахтарыттан өй-санаа, эт-хаан өттүнэн хаалар, саҥата хойут сайдар, ньиэрбинэй систиэмэтин үлэтэ кэһиллэр.

Элбэхтик салгыҥҥа сылдьан эти-хааны эрчийэр хамсаныылаах оонньуулары, араас дьарыктары, үлэлии үөрэнэр уонна бэйэни көрүнэр сатабыллары киллэрэн иһиҥ. Оҕо дьарыга сааһыгар сөп түбэһиэхтээх, киниэхэ уустук сорудахтары биэрэн туһалыырдааҕар, хата, төттөрүтүн буортуну оҥоруохха сөп.

Оҕону кытта төһө кэм дьарыктаныахтаахпытый?

3 саастарын туолуохтарыгар диэри күҥҥэ биирдэ 8-10 мүнүүтэ дьарыгы ыытар ордук.

4 сааһыттан оҕо дьарыгын 15 мүнүүтэҕэ диэри уһатабыт.

5 саастаах оҕо 20 мүнүүтэ күҥҥэ иккитэ дьарыктанар.

6 саастаах оҕо 25 мүнүүтэ күҥҥэ үстэ дьарыктанар.

Оҕо туругуттан, баҕа санаатыттан көрөн уларыйыылары киллэриэххитин сөп.

Кыра оҕо сүрүн дьарыга – оонньуу. Онон иллэҥ кэмҥитигэр оҕолоргутун кытта оонньооҥ, кэпсэтиҥ, чугастык бодоруһуҥ. Оҕо сайдыыта, уһуйаан иитээччититтэн, эбэттэн-эһэттэн эрэ буолбакка, төрөппүттэртэн ордук тутулуктааҕын өйдөөҥ.

Аныгы оҕо интэриэһэ виртуальнай эйгэҕэ көһөрө олус судургу. Суотабайы, планшеты туттаран кэбиһэр төрөппүккэ эмиэ чэпчэки. Үлэнэн үлүһүйэн, харчы эккирэтиитигэр оҕолоргут саамай көмүс саастарын – оҕо саастарын куоттарымаҥ.