Көхтөөх уокурук үс сквери туруорсар

Соторутааҕыта Губинскай уокурукка эһиилги сылга Олохтоох көҕүлээһиннэри өйүүр бырагыраамаҕа кыттар бырайыактары сүүмэрдээтилэр.  

Уокурук салайааччытын э.т. Валентин Романов иһитиннэрбитинэн, нэһилиэнньэҕэ ыытыллыбыт ыйытык уонна куоластааһын түмүгүнэн 2023 сылга үс бырайыагы өйүүргэ быһаарыныы ылылынна: А.А. Рыжиков аатынан сквери, иитээччи скверин уонна А.Н. Осипов аатынан худуоһунньук скверин тупсаран оҥоруу. 

Манна даҕатан эттэххэ, бырайыак үлэлиэҕиттэн уокурукка икки эбийиэк олоххо киирбит. Ол курдук, 2019 сыллаахха Владимир Губин бюһа туруоруллубута, онтон 2020 сыллаахха 202-с уонна 203-с дьоҕус оройуоннары ситимниир сатыы дьон туоруур сирдэрэ оҥоһуллубута.  

Худуоһунньук скверин норуодунай худуоһунньук Афанасий Осипов төрөөбүтэ 95 сылыгар анаан оҥорор, кэнэҕэскитин киниэхэ пааматынньык туруорар баҕа санаалаахтар. Онно мольбертары туруорар, инникитин араас быыстапкалары уонна көрсүһүүлэри тэрийэр, оҕолорго аналлаах куонкурустары ыытар былааннаахтар. Бу туһунан көҕүлүүр бөлөх бэрэстэбиитэлэ Наталья Христофорова кэпсээтэ. 

Иитээччи скверин тупсаран оҥоруу туһунан бөлөх аатыттан Марьяна Иванова тыл эттэ. Эбийиэк 203-с дьоҕус оройуон 35/1 нүөмэрдээх куорпуһун таһыгар оҥоһуллара былааннанар. Бу миэстэ мээнэҕэ талыллыбатах – мантан иитээччилэри көччөх гынан көтүтэн таһаарар икки сүрүн кыһа – С.Ф. Гоголев аатынан Дьокуускайдааҕы педколледж уонна М.К. Аммосов аатынан ХИФУ Педагогическай института чугастар.  

Сквергэ иитээччигэ пааматынньык туруоруллуоҕа. Марьяна Иванова иитээччи үүнэр көлүөнэни иитэн таһаарар, сайыннарар киһи буоларын бэлиэтээн туран,  ытыктанар идэ статуһун үрдэтэр сыаллаах-соруктаах бырайыагы уопсастыбаннас өйүө диэн эрэнэллэрин биллэрдэ.  

А.А. Рыжиков аатынан сквери тупсаран оҥорууну туруорсар бөлөх бэрэссэдээтэлэ Николай Новошапин 2002 сыллаахха Арассыыйа Дьоруойа, милиция подполковнига Александр Александрович Рыжиков аатынан мемориальнай сквер оҥоһуллубутун санатта. Сквер сулууспалыы сылдьан уонна кыргыһыы хонуутугар өлбүт Саха сиринээҕи ОМОН хамандыырыгар, Ис дьыала салаатын үлэһиттэригэр, СӨ Росгвардиятыгар  аналлаах.

Николай Новошапин сквер үүнэр көлүөнэҕэ иитэр-үөрэтэр дириҥ суолталааҕын бэлиэтээтэ, куорат олохтоохторо уонна ыалдьыттара дьоруойдарбыт хорсун быһыыларын билиэхтээхтэр, кинилэр ааттарын үйэтитиэхтээхпит диэтэ.