17.11.2022 | 14:00

Ини-бии Ноговицыннар хапсаҕайга XVII турнирдара

Сэтинньи 12-13 күннэригэр “Модун” спорткомплекска бырааттыы Ноговицыннар хапсаҕайга “А” категориялаах XVII турнирдарыгар 305 бөҕөс күөн көрүстэ. Тустууктар биир дойдулаахтара дьааҥылар турнир бириистэрин туруортаатылар.
Ини-бии Ноговицыннар хапсаҕайга XVII турнирдара
Ааптар: Баһылай ПОСЕЛЬСКАЙ

Ыраах диэбэккэ, Дьааҥыттан элбэх киһи, ол иһигэр нэһилиэктэр баһылыктара, Верхоянскай куораттан Михаил Садовников, Элгэстэн Святослав Слепцов, Табалаахтан Анна Рожина,  улуус дьокутааттарын бэрэссэдээтэлэ Екатерина Ноговицына, улуус баһылыга Владислав Иванов бэйэтинэн кэлэн, хапсаҕайдьыт уолаттарыгар астына-дуоһуйа “ыарыйдылар”. Хоту сир хоһуун ыччаттара Егор Находкин 57 кг бастакы миэстэни, Дьулустаан Попов 95 кг үсүһү ылаттааннар ыраахтан кэлбит биир дойдулаахтарын үөртүлэр, сүргэлэрин көтөхтүлэр.

Дьааҥы бөҕө-быһый дьонун туһунан Ноговицыннар турнирдарын көтүппэккэ кэлэн көрөр, улуу тренер Д.П. Коркин иитиллээччитэ, үтүөлээх тренер Петр Васильевич Портнягин тэрийбит спорка албан аат Музейыгар баар суруктан-бичиктэн, баай экспонаттартан бэрт үгүһү билиэххэ сөп.

Валентин, Трофим, Иван, Павел, Михаил, Моисей, Василий — сэттэ бииргэ төрөөбүт ини-биилэр бары тустуунан дьарыктанан улааппыттара. Улуустарын, бүтүн Сахаларын сирин соргулаахтык ааттаппыттара.  Учуутал уонна алгысчыт аҕалара Василий Павлович уолаттарын бэйэтин кытта батыһыннара сылдьан айылҕаҕа “буһарара-хатарара”, сир-дойду, күүстээх дьон тустарынан бараммат кэпсээннэри иҥэрэн улаатыннартаабыта. Ытык аҕаларын үөрэҕин оҕо эрдэхтэриттэн дириҥник ылыммыт уолаттар спорка, норуот  хаһаайыстыбатын араас салааларыгар холобурга сылдьар туруу үлэһиттэр.

Элбэх биллиилээх бөҕөстөрү таһаартаабыт турнир аан бастаан 1998 сыллаахха тэриллибитэ. Өрөспүүбүлүкэ хапсаҕайга Федерациятын толорооччу дириэктэрэ Алексей Егорович Мостахов көҕүлээһининэн тустууну олохторун аргыһа оҥостубут сэттэ дьоһун-мааны уоллаах ытыктанар аҕа Василий Павлович Ноговицын 75 сааһыгар анаммыта. Уон сэттэ  турнир күүрээннээх хапсыһыыларын Александр Васильевич Васильев-Көрдүгэн күн бүгүнүгэр диэри кэпсээн-ипсээн, түһүлгэни улаханнык сэргэхситэр.

Хапсаҕай эриэккэс албастара хото туттулуннулар. Сытыы бырахсыылар буоллулар. 

Сылбырҕа, түргэн хамсаныылаахтар кыайыылары ситистилэр.

57 кг Егор Находкин (Дьааҥы), Олимпий Васильев (Үөһээ Бүлүү), Иван Степанов (Уус Алдан); 65 кг Айсен Поскачин (Кэбээйи), Юрий Сыромятников (Томпо), Гаврил Илларионов (Үөһээ Бүлүү); 75 кг Рустам Прокопьев (Үөһээ Бүлүү), Ньургун Андреев (Мииринэй), Семен Владимиров (Таатта); 85 кг Константин Власов (Мэҥэ Хаҥалас), Олег Чернов (Томпо), Анатолий Сивцев (Чурапчы); 95 кг Николай Николаев (Бүлүү), Сергей Семенов (Нам), Дьулустаан Попов (Дьааҥы); 95 кг үөһэ Андрей Аронов (Мииринэй), Иван Алексеев (Бүлүү), Увар Тимофеев (Үөһээ Бүлүү) туһааннааҕынан бастакы, иккис, үһүс миэстэлэри ылаттаатылар, өйдөбүнньүк мэтээллэри, дипломнары сэргэ 30-20-10 тыһ.солк. уонна сыаналаах бириистэринэн наҕараадаланнылар.

Аан Дархан аатын 75 кг Кэбээйи Мукучутун хапсаҕайга оскуолатын иитиллээччитэ, Чурапчы институтун IV кууруһугар үөрэнэр Иван Семенов ылла.

75 кг үөһэ саамай ыарахан  ыйааһыннаахтарга Ньурба аатыттан тустубут М.К. Аммосов аатынан Хотугулуу-Илиҥҥи федеральнай университет спорка институтун II кууруһугар үөрэнэр Муома ыччата, өрөспүүбүлүкэ көҥүл тустууга уонна хапсаҕайга чөмпүйүөнэ, Саха сирин көҥүл тустууга сүүмэрдэммит хамаандатын чилиэнэ, икки тустуу маастара Никита Хабаров Увар Тимофеев, Николай Николаев, Андрей Аронов, Степан Гаврильев, Платон Саввинов курдук күүстээх маастардары кэннигэр хааллартаан, Аан Дархан аатын ылары ситистэ.

“Бу турнирга оҕо эрдэхпиттэн  миэстэлэһиэхпин баҕарар этим. Төрдүбэр күүстээх дьон, аймахтар бааллар. Олимпийскай эрэл училищетыгар үс-түөрт сыл үөрэммитим. Тренерим Алексей Сергеевич Некрасов, куруутун  аттыбар баар, көмөлөһөр.  Күүс-уох өттүнэн күүскэ үлэлээммит эбилинним. Онон тренербэр махтанабын. Сотору Арассыыйа Кубогар, онтон Ярыгин турнирыгар кыттыахтаахпын. Арассыыйа тустууктарыгар баһыйтарабын. Ол эрээри күүскэ эрчиллэн эбиллиэм, икки-үс сылынан үчүгэй буолуом дии  саныыбын. Дойдубар сылдьыбатаҕым икки сыл буолла. Саҥа дьылга дьоммор тиийэр баҕалаахпын, – диэн кэпсээтэ Никита Хабаров.

 

Турниртан турнирга саҥаттан саҥа ааттар тахсаллар. Эдэрдэр кимиэллээхтик киирэллэрэ саха тустуута кэскиллээҕин кэрэһилиир.

Сонуннар

Ордук ааҕаллар

Николай Винокуров:  «Дойдубар этэҥҥэ эргиллэн кэллим...»
Дьон | 19.11.2022 | 18:00
Николай Винокуров: «Дойдубар этэҥҥэ эргиллэн кэллим...»
«Боотур» этэрээт байыастарын ортотугар биһиги биир дойдулаахпыт Алаһыай нэһилиэгиттэн төрүттээх Николай Винокуров баарын истэн, кэпсэтиэхпин баҕардым. Ол эрэн сэһэргэһиибин хайдах-туох саҕалыахпын тобуларбар олус ыарахан этэ. Бу үлэ, үөрэх, сайдыы, тэрээһин туһунан суруйуу, кэпсэтии буолбатах... Бу — олох, дьылҕа, тыын былдьаһыы, өлүү-сүтүү, инники олох иһин охсуһуу туһунан сэһэргэһии. Николай тута хоруйдаабытыгар...
Халбаакыттан — Олоҥхо тыйаатырыгар
Дьон | 25.11.2022 | 10:20
Халбаакыттан — Олоҥхо тыйаатырыгар
Дьокуускайга саха тылын учууталларын сийиэстэрин сэргэ өрөспүүбүлүкэтээҕи Олоҥхо декадата ыытылла турар. Оттон чулуу айымньыбыт баай философиятын кэлэр ыччакка тиэрдэр биир бэртээхэй ньыманан тыйаатыр буолар. Бу дьыл сэтинньитигэр Олоҥхо тыйаатыра «Дьорҕостой Бэргэн» куукуланан испэктээк туруоран сүрэхтээбитэ. Режиссер Гаврил Мэҥкээрэп Николай Калинович Шамаев-Чопчухаан (Үөһээ Бүлүү) олоҥхотунан туруоруутун Дьокуускай куорат хас да уһуйааныгар...
Мария Матвеева:  «Дьоҥҥо үтүөнэн эрэ сырыттахха, олорорго чэпчэки»
Дьон | 26.11.2022 | 10:00
Мария Матвеева: «Дьоҥҥо үтүөнэн эрэ сырыттахха, олорорго чэпчэки»
Тыа сиригэр көмүс куоластаахтар, үҥкүүһүттэр, айар, суруйар дьон баалларын куруук кэрэхсии, сэргии истэбит. Ханна да сырыттарбын талааннаах дьону кытта билсэрбин, санаа атастаһарбын туохтааҕар да ордоробун.
Элэгэнтэй Адамов:  «Сиэрдээх өй-санаа төрүт дьарыкка эрэ баар»
Дьон | 20.11.2022 | 11:00
Элэгэнтэй Адамов: «Сиэрдээх өй-санаа төрүт дьарыкка эрэ баар»
Бүгүҥҥү нүөмэргэ Чурапчы улууһун Чакыр нэһилиэгин олохтооҕо Элэгэнтэй Адамовы кытта тыа сирин олоҕун, итэҕэл, уус идэтин, сайдыы, норуот дьылҕатын, кэскилин туһунан сэһэргэстибит. Дьоҕурдаах киһи анаарыыта киэҥэ, этэр тыла оруннааҕа сөхтөрдө.