Ил Дархан Бүтүн Арассыыйатааҕы нэһилиэнньэ биэрэпиһэ сүдү суолталааҕын бэлиэтиир

Айсен Николаев «Якутия 24» телеханаалга өрөспүүбүлүкэ олохтоохторугар туһаайан Бүтүн Арассыыйатааҕы нэһилиэнньэ биэрэпиһэ сайдыы саҥа соруктарын оҥорор төрүөтүнэн буолуоҕа диэн бэлиэтээтэ. 
«Бу уон сылга биирдэ ыытыллар, биһиги өрөспүүбүлүкэбитигэр уонна элбэх омук олорор баараҕай дойдубутугар бүттүүнүгэр сүдү суолталаах түбэлтэ. Бүтүн Арассыыйатааҕы нэһилиэнньэ биэрэпиһэ уон сыл тухары буолар уларыйыылары эрэ көрдөрөр буолбакка, сайдыы саҥа соруктарын туруорарга олук буолар уонна уруккулары чопчулуур», – диэтэ кини.
Саха сирин баһылыга бэлиэтээбитинэн, ол иһин биэрэпис түмүктэрэ сөптөөх, чуолкай буолуохтаахтар уонна өрөспүүбүлүкэҕэ баар дьиҥнээх быһыыны-майгыны көрдөрүөхтээхтэр.  
«Ол туһугар биэрэпискэ хас биирдии Саха сирин олохтооҕо кыттара булгуччулаах. Биэрэпис түмүктэрэ стратегическай быһаарыылары ылынарга, өрөспүүбүлүкэ сайдыытын демографическай, экономическэй, социальнай бырагыраамаларын оҥорорго туттуллуохтара. Кинилэр көмөлөрүнэн инфраструктура, суол, тырааныспар, гаас, уот ситимнэрин, оптоволоконнай сибээс сайдыыта, оскуола, оҕо уһуйааннарын, балыыһа, култуура уонна спорт эбийиэктэрин тутуута былааннанар», – диэн эттэ  Айсен Николаев.
Кини бэлиэтээбитинэн, Бүтүн Арассыыйатааҕы нэһилиэнньэ биэрэпиһигэр быйыл пандемия усулуобуйатыгар олохтоохторго куттал суоһаабатын курдук цифровой технологиялар туттуллуохтара.  
«Хас биирдии киһиэхэ Судаарыстыбаннай өҥө порталын нөҥүө биэрэпиһи ааһар кыах баар буолуо. Ити билиҥҥи усулуобуйаҕа улахан суолталаах», – диэн түмүктээтэ Айсен  Николаев.