Ил Дархан «Азия оҕолоро» оонньууларга бэлэми бэрэбиэркэлээтэ
Өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрбитинэн, Ил Дархан Айсен Николаев, «Азия оҕолоро» VIII-с норуоттар икки ардыларынааҕы оонньуулары ыытыы чэрчитинэн, тэрийэр хамыыһыйа мунньаҕын ыытта.
Мунньахха инфраструктура эбийиэктэрэ бэлэмнэрин тула кэпсэттилэр. «Азия оҕолоро» VIII-с норуоттар икки ардыларынааҕы оонньуулар 2024 сыл бэс ыйын 25 күнүттэн от ыйын 7 күнүгэр диэри Дьокуускайга ыытыллыахтара.
«Биллэн турар, маннык таһымнаах тэрээһиҥҥэ олохтоохтук бэлэмнэнэр ирдэнэр. Туох баар кыһалҕа барыта быһаарыллыахтаах, ол иһигэр тутууну, эбийиэктэр өрөмүөннэрин, тырааныспары, итиэннэ кыттааччылары олордууну, аһатыыны, куттал суох буолуутун хааччыйыыны кытта сибээстээх боппуруостар», - диэтэ Айсен Николаев.
Тэрийэр хамыыһыйа мунньаҕар суол каартатын оҥоруу туһунан отчуот истилиннэ.
«Бүгүҥҥү күҥҥэ инфраструктура эбийиэктэрин бэлэмнээһин былаана оҥоһулунна уонна толоруллар. Кыттааччылар аккредитацияларын концепциятын, куорат туонатын тупсарыы, волонтердары ыҥыран үөрэтии бигэргэтиллиэхтээх», – диэн иһитиннэрдэ бырабыыталыстыба бэрэссэдээтэлин солбуйааччы Сергей Местников.
Ил Дархан сорудаҕынан, билиҥҥи туругунан, спортивнай эбийиэктэргэ, уопсай дьиэлэргэ уонна уопсастыбаннай туоналарга өрөмүөн ыытыллар, киин куорат суоллара саҥардыллаллар. Оонньуулары көрсө Хатас сэлиэнньэтигэр икки этээстээх, 400 миэстэлээх, 2,3 тыһ. кв. миэтэрэ иэннээх спортивнай комплекс тутуллар. Билигин эбийиэк бэлэмэ – 88%.
Оонньуулар ыытыллар кэмнэригэр 16 спорт, 23 ыалдьыттары олордор уонна 24 ас-үөл эбийиэгэ үлэлэһиэҕэ.
Сонуннар
Ордук ааҕаллар
