Икки тыл — икки бүк кыах

Быйыл онус төгүлүн ыытыллар күрэҕи Үөрэх управлениета уонна 13 №-дээх оскуола кэлэктиибэ тэрийдилэр. 13 №-дээх оскуола дириэктэрэ Галина Прокопьевна Васильева, Арчы дьиэтин дириэктэрэ Лариса Константоновна Андреева уонна Үөрэх управлениетын мониториҥҥа уонна үөрэҕи сайыннарыыга сүрүн исписэлииһэ Варвара Степановна Новгородова бэйэлэрин эҕэрдэ тылларыгар 2014 сылтан быйыл онус төгүлүн ыытыллар күрэх куорат эйгэтигэр улаатар, нуучча тыллаах оскуолаҕа үөрэнэр саха оҕолорун, төрөппүттэри төрүт култуураҕа сыһыарар, икки тылы тэҥҥэ тутан алтыһыы, иитиллии үүнэр, сайдар кыаҕы күүһүрдэрин санатар сыаллааҕын бэлиэтээтилэр.

Быйылгы күрэх сүрүн уратытынан үөрэнээччилэр хамаандаларыгар ийэлэр, эбээлэр киирбиттэрэ буолла. Оттон хамаандалар бэйэни билиһиннэриигэ, саха уонна нуучча өһүн хоһооннорун салгыы этиигэ, литературнай айымньылар дьоруойдарын, ырыалары таайыыга, былыргы туттар малы-салы билиигэ күрэхтэстилэр,  «Ойбонтон уулааһын» курдук саха төрүт оонньуутугар холоннулар.

Умсугутуулаах оонньуу-күрэс кыайыылааҕынан 1 №-дээх оскуола хамаандата таҕыста, иккис миэстэҕэ М.И. Кершенгольц аатынан 9 №-дээх оскуола тигистэ, үһүс миэстэни Сэбиэскэй Сойуус Дьоруойа Федор Попов аатынан 20 №-дээх оскуола ылла.