Икки көлүөнэ көрүстэ

Биһиги оскуолабытыгар кулун тутар 15 күнүгэр истиҥ, иһирэх көрсүһүү буолан ааста. Хатырык оскуолатын 50 сыл анараа өттүгэр бүтэрбит аҕам саастаах дьоннорбут биһигини, оскуола быйылгы выпускниктарын, кытта көрсүһүүнү тэрийдилэр.

Бастаан бэйэлэрин билиһиннэрдилэр, оччотооҕу үөрэммит үтүө кэмнэрин, учууталларын, көрдөөх күннэрин ахтан-санаан аастылар.

Ыалдьыттарбытыгар кылааспытын билиһиннэрдибит, уолаттар хоһоон аахтылар. Оҕолорго кылынан харысхал бэлиэлэрин оҥорорго маастар-кылаас ыыттылар, биһиги оҥорбут харысхалбытын бэлэх тутан үөрдүбүт. Хатырык нэһилиэгин төһө билэҕитий диэн ис хоһоонноох "Өркөн  өй" күрэх ыыттылар.

Сахалыы этнофитес, мас атынан күрэхтэһии  буолла.

Ол кэннэ мааны астаах сандалы тула олорон элбэх сүбэни-аманы биэрдилэр, оҕолорго баҕа санаалаах суруктары, урут үөрэммит уонна билиҥҥи оскуолаларын хаартыскалаах ыстакааннары бэлэх ууннулар.

Оскуола дириэктэригэр баҕа санаалары этэн туран, оскуолаҕа сынньанар балаһааккаҕа ыскамыайка бэлэхтээтилэр.

Өссө биир долгутуулаах, үөрүүлээх түгэн – икки оҕоҕо үөрэххэ киирэллэригэр бастакы олук көмөлөрүн оҥордулар.

Бу көрсүһүүттэн биһиги олохпутугар туһанар элбэх сүбэни ыллыбыт уонна бар дьоммутугар истиҥ баҕа санааларбытын этэн биэчэрбитин түмүктээтибит.