«Хоту тент» байыаннай сулууспалаахтарга оҥорор бородууксуйатын элбэтиэҕэ

«Хоту тент» анал байыаннай эпэрээссийэ кыттыылаахтарыгар анаан тыһыынча утуйар мөһөөччүгү тиктэ, бу нэдиэлэҕэ өссө 126-ны тигиэҕэ. Саха сирин Ил Дархана Айсен Николаев хампаанньаҕа сырытта, оҥоһуктарын хаачыстыбатын бэрэбиэркэлээтэ.

«Хампаанньа бородууксуйатын үтүө өрүтэ – дьоҕус, түргэнник хомуллар, сиигирбэт. Ол иһин арҕаа дойдулар, бэйэбит дойдубут даҕаны аналогтарын кытта ситиһиилээхтик күрэс былдьаһар кыахтаах. Хампаанньа үлэтин хайысхатын уларытан байыаннай сулууспалаахтарга анаан тигэр, сыахтарын кэҥэттэ», – диэн бэлиэтээтэ Айсен Николаев.

«Хоту Тент» салайааччыта Афанасий Махатыров эппитинэн, бородууксуйаны хампаанньа бэйэтэ оҥорбут сылааһы тутар инновационнай матырыйаалыттан тигэллэр.  Бастакы баартыйа байыаннай чаастарга тиксэриллибит.

Хампаанньа иистэнньэҥнэрин сэргэ волонтердар үлэлэһэллэр. Бу иннинэ Технология уонна дизайн колледжын устудьуоннара көмөлөспүттэр, бу нэдиэлэҕэ Сервис технологическэй техникумун үөрэнээччилэрин күүтэллэр.