ХИФУ преподавателэ Национальнай бириэмийэ кыайыылааҕынан буолла

 «Патриот-2023» Национальнай бириэмийэ Арассыыйа иһигэр уонна тас өттүгэр гражданскай-патриотическай иитиигэ сүҥкэн кылааты киллэрии иһин бэриллэр. Бириэмийэ «Арассыыйа үгэс буолбут духуобунай, сиэр-майгы өттүнэн сыаннастарын харыстааһын уонна бөҕөргөтүү» номинация кыайыылааҕынан Хотугулуу-Илиҥҥи федеральнай университет преподавателэ Дмитрий Жирков буолла.

Быйыл бириэмийэҕэ кыттарга 2125 сайаапка киирдэ, номинаннарынан 87 киһи уонна тэрилтэ буолла, түмүккэ баара-суоҕа 29 кыттааччы лауреат аатын сүктэ. Филологическай факультет преподавателэ Дмитрий Жирков «Популяризация и продвижение русского языка» хос номинацияҕа кыайда.

«Судаарыстыбыннай таһымҥа билиниини ылбыппыттан үөрэбин. Ити үрдэли баһылааһын уустук, ол эрэн үтүө түмүктээх үлэнэн буолла», – диэн санаатын үллэһиннэ «Русская литература XX века и теория литературы» кафедра преподавателэ Дмитрий Жирков.

«Аҕа дойду литературатын уонна нуучча тылын үөрэтии – үүнэр көлүөнэни патриотизм тыыныгар иитии биир сүрүн тосхоло. Научнай-сырдатар тэрээһиннэр көмөлөрүнэн Дмитрий Жирков ыччакка нуучча тылын баайын тиэрдэр» – диэн бириэмийэ туттарыытыгар этилиннэ.

Итини сэргэ, Дмитрий Жирков үөрэнээччилэрин хамаандатын кытта литература туһунан видео-, теле-, киинэбырайыактары оҥороро дьоһун суолталааҕа бэлиэтэннэ. Бүгүҥҥү кэмҥэ преподаватель бэйэтин эйгэтигэр улаханнык ытыктанар, Арассыыйа педагогтарыгар научнай-методическай таһымҥа лекциялары ааҕар уонна маастар-кылаастары ыытар.

Тэрээһин кыттыылаахтарын Арассыыйа Федерациятын бэрэсидьиэнэ Владимир Путин эҕэрдэлээтэ: «Эһиги сиэр-майгы, патриотизм уонна гражданственность сыаннастарыгар олоҕуран үүнэр көлүөнэни иитэҕит. Күүскүтүн-уоххутун устуоруйабыт дьоруойдуу кэмнэрин туһунан өйдөбүлү, баай култуурунай, духуобунай нэһилиэстибэни харыстааһыҥҥа туһаайаҕыт. Бүгүҥҥү күҥҥэ эһиги үөрэтэр-сырдатар үлэҕит хаһааҥҥытааҕар даҕаны наадалаах диэн бэлиэтээн этиэхпин баҕарабын».