ХИФУ педагогтары саҥа таһымҥа бэлэмниир

«Устудьуоннарбыт биэс гыммыт биирдэрэ – кэнэҕэски педагогтар, биллэн турар, үрдүк квалификациялаах педагогическай каадырдары бэлэмниир дойду биир бастыҥ үрдүк үөрэх кыһатын кытта бииргэ үлэлиирбит дьоһун суолталаах», – диэтэ ХИФУ ректора Анатолий Николаев.

Москватааҕы педагогическай судаарыстыбаннай университет ректора Алексей Лубков бэлиэтээбитинэн, икки үрдүк үөрэх кыһата баай уопуттаах уонна министиэристибэлэртэн өйөбүллээх.

«Саҥа партнердарбыт кэккэтэ кэҥээн иһэр, биирдэстэринэн Саха сирин үрдүк үөрэҕин сүрүн кыһата буолбута дьоһун суолталаах. Бу принципиальнай сөбүлэҥ, тоҕо диэтэххэ ХИФУ – Педагогическай үөрэхтээһин сайдыытын ассоциациятын кыттыылааҕа. Стратегическай соруктары быһаарарга үрдүк үөрэх кыһалара бэйэ-бэйэлэрин өйөөһүннэрин кэмэ кэллэ», – диэн Алексей Лубков санаатын үллэһиннэ.