ХИФУ хамаандата – Бүтүн Арассыыйатааҕы олимпиада кыайыылааҕа

Хотугулуу-Илиҥҥи федеральнай университет медицинскэй институтун хамаандата Владивосток куоракка ыытыллыбыт киһи физиологиятын Бүтүн Арассыыйатааҕы олимпиадатыгар кыайыылааҕынан таҕыста диэн ХИФУ пресс-сулууспата иһитиннэрдэ.

Хамаанда састаабыгар түөрт устудьуон киирдэ – Мария Лобанова, Денис Шивкин, Владимир Егоров уонна Елизавета Птицына.

«Биһиги олимпиадаттан уонна ситиһиибититтэн тылынан сатаан эппэттик улаханнык үөрэн, долгуйан сылдьабыт. «Insight» олимпиада – наһаа үчүгэйдик толкуйданан оҥоһуллубут, аныгы, киэҥ хабааннаах, медик-устудьуоннарга анаммыт олус интириэһинэй тэрээһин. Манна дизайныттан өйдөбүнньүк бэлэҕэр тиийэ барыта ураты форматтаах», – диир хамаанда хапытаана Мария Лобанова.

Кини эппитинэн, олимпиада күрэҕэ үс күн ыытылынна. Итини сэргэ устудьуоннарга анаан экскурсиялар,  ыҥырыылаах ыалдьыт быһыытынан кэлбит преподавателлэр лекциялара тэрилиннилэр.