Харах балыыһатыгар обсерватор арылынна

Өрөспүүбүлүкэтээҕи харах балыыһатын үлэһиттэрэ коронавирустаабыттарынан сибээстээн балыыһаҕа обсерватор тэрилиннэ. Бу туһунан өрөспүүбүлүкэтээҕи суһал штаб иһитиннэрэр.

СOVID-19 лазернай хирургия киинин бырааһыгар, клинико-диагностическай салаа сиэстирэтигэр уонна санитаркатыгар, суһал офтальмологическэй көмө санитаркатыгар бигэргэммитэ. Балыыһаҕа толору дезинфекция ыытылынна, ыалдьыбыттары кытта алтыспыт дьон быһаарылыннылар. Суһал көмө пуунугар, күнүскү стационарга уонна харах балыыһатыгар сытан эмтэммит дьон испииһэгэ Роспотребнадзор өрөспүүбүлүкэтээҕи управлениетыгар тиксэрилиннэ.

Коронавирус булуллар кэмигэр балыыһаҕа сыппыт дьоҥҥо обсерватор аһылынна. Ыарыһахтар икки нэдиэлэ устата изоляцияҕа сытан салгыы эмтэниэхтэрэ. Маны таһынан, саҥа киирэр ыарыһахтарга суһал көмөнү оҥорор төгүрүк сууккалаах стационар тэриллиэҕэ.

Ил Дархан Айсен Николаев бүтэһик сууккаҕа өрөспүүбүлүкэҕэ коронавируһунан ыалдьыы 7 саҥа түбэлтэтэ бэлиэтэммитин туһунан брифинг кэмигэр иһитиннэрдэ. Дьокуускайга 6 киһи коронавирустаабыта билиннэ. 1 Хаҥалас улууһун олохтооҕо ыалдьыбыта барыллаан бигэргэннэ.

Муус устар 27 күнүн туругунан, Саха сиригэр уопсайа 164 киһи коронавирустаата. 18 киһи эмтэннэ.