Хаар десана» байыаннай сулууспалаахтар дьиэ кэргэттэригэр көмөлөһөр

«Хаар десанын» байыастара Автодорожнай уонна Сайсары уокуруктарыгар үлэлээтилэр.

«Өрөбүллэргэ устудьуоннар этэрээттэрин кытта куораттааҕы Байыаннай сулууспалаахтар дьиэ кэргэттэрин өйүүр кииҥҥэ киирбит сайаапкаларынан үлэлээтибит. Итини таһынан, хаар түһүөҕүттэн ыла суол сулууспалара тохтоло суох үлэлииллэр, ол курдук – 6 грейдер, 12 сиппийэр массыына, 6 тыраахтыр, 5 погрузчик, 4 бобкет уонна 18 хаары тиэйэр самосвал» - диир «Куорат хаһаайыстыбатын үлэлэтэр сулууспа» МХТ салайааччыта Владимир Аммосов.

Санатар буоллахха, «Хаар десана» – патриотическай уонна сиэр-майгы өттүнэн иитэр, волонтерскай хамсааһыны пропагандалыыр сыаллаах Бүтүн Арассыыйатааҕы социальнай-патриотическай аахсыйа. Аахсыйа чэрчитинэн үрдүк үөрэх кыһаларын устудьуоннара уонна волонтердар олохтоохторго көмөнү оҥороллор, патриотическай иитиигэ, нэһилиэнньэни сырдатыыга уонна чөл олоҕу түстээһиҥҥэ туһуламмыт араас тэрээһиннэри ыыталлар.