Грипп утары быһыыны 59 тыһыынчаттан тахса киһи ылбыт

Саха сиригэр грипп утары быһыыны 59 тыһыынчаттан тахса киһи, ол иһигэр 29 тыһыынча оҕо ылбыт. Ол туһунан Роспотребнадзор регионнааҕы управлениетын пресс-сулууспата иһитиннэрдэ.
Иммунизацияны «Совигрипп» уонна «Ультрикс квадри» вакциналарынан оҥороллор. Саха сиригэр быһыынан барыта 60% нэһилиэнньэни – 217 тыһыынча оҕону уонна 363 тыһыынча улахан киһини хабар былааннаммыт.
Грипп утары вакцинацияны ордук сэрэхтээх бөлөххө сылдьар гражданнар ылаллар. Ити коронавируһунан ыалдьыбыттар, оҕолор (6 ыйыттан саҕалаан), устудьуоннар, 60 саастарыттан үөһээ дьон, оҕо күүтэр дьахталлар (2-3 триместр), призывниктар, хроническай ыарыылаах дьон уонна үлэлэрин хайысхаларынан көрөн. 
Быһыыны олорор эбэтэр үлэлиир сирдэринэн поликлиникаларга ылыахтарын сөп. Итини сэргэ үөрэх кыһаларынан уонна тэрилтэлэринэн быһыы туруорар биригээдэлэр сылдьаллар.