Евгений Григорьев ВЭФ балаһааккатыгар куорат маастар-былаанын билиһиннэрдэ

Евгений Григорьев бэлиэтээбитинэн, чугаһынааҕы сылларга маастар-былааны олоххо киллэрии нэһилиэнньэ олоҕун хаачыстыбатын тупсарыаҕа уонна куорат социальнай-экономическэй сайдыыта бигэ туруктаах буоларын хааччыйыаҕа.

«Маастар-былаан олоххо киириитэ куорат нэһилиэнньэтигэр, өрөспүүбүлүкэ олохтоохторугар уонна дойдубут хотугулуу-илиҥҥи өттүгэр барытыгар үтүө дьайыылаах буолуоҕа. Сүрүн сорукпут – нэһилиэнньэ ахсаанын элбэтии, креативнай экономиканы сайыннарыы. Итиэннэ Дьокуускайы Уһук Илин  креативнай киининэн уонна ирбэт тоҥ үрдүгэр бастыҥ куоратынан оҥорор сыаллаахпыт», - диэн бэлиэтээтэ Евгений Григорьев.

Куорат баһылыга презентацияҕа маастар-былаан сүрүн хайысхаларын бэлиэтээтэ, итиннэ Саха сиригэр туризм сайдыыта, «Якутия» ТОР, хаарбах дьиэ пуондатыттан гражданнары көһөрүү, территориялар биир кэлим сайдыылара уонна куорат нэһилиэнньэтэ бары өттүнэн табыгастаахтык олорорун туһугар тупсаран оҥоруу бырайыактара киирэллэр. Дьокуускай социальнай-экономическэй сайдыытыгар Өлүөнэ өрүһү туоруур муоста тутуута төһүү күүһүнэн буолуоҕа.