Евгений Григорьев спорт эйгэтин үлэһиттэрин иннигэр отчуоттаата

Тохсунньу 26 күнүгэр Евгений Григорьев 2023 сыл социальнай-экономическай ситииһилэрин туһунан отчуотун спорт эйгэтин бэрэстэбиитэллэрин иннигэр иһитиннэрдэ.

Баһылык Евгений Григорьев эппитин курдук, Дьокуускай куоракка физическэй култуура уонна спорт сүрүн соругунан чөл олоҕу сайыннарыы буолар. Ону киин куоракка спорт инфраструктуратын тупсарыыга ыытыллар киэҥ хабааннаах үлэ туоһулуур.

Ол курдук, ааспыт 2023 сыл биир дьоһун ситиһиитинэн биир кэмҥэ 6 бөдөҥ спорт эбийиэгэ тутуллубута буолар. 10 уонна 20 №№-дээх орто оскуолаларга модульнай спорт саалалара тутулуннулар, 5 воркаут-балаһаакка үлэҕэ киирдэ, Култуура уонна сынньалаҥ пааркатыгар ГТО балаһаакката тутулунна, 4 уонна 6 №№-дээх Оҕо спорт оскуолаларыгар өрөмүөн ыытылынна.

Маны сэргэ Сайсарыга спорт саалата, «Звезднай» түөлбэҕэ сабыылаах каток, Губин уулуссатыгар спорт саалата быйыл үлэҕэ киирээри тураллар. Бу күннэргэ Хатаска спорт саалата арылынна.

2024 сыллаахха Култуура уонна сынньалаҥ пааркатыгар спордунан дьарыктанарга анал миэстэ, 17-с кыбаарталга уонна Пригороднай бөһүөлэгэр саҥа спорт саалалара тутуллуохтара, 9 оҕо спорт оскуолатыгар өрөмүөн ыытыллар.

Аҕам саастаах дьоҥҥо анаан 202-с түөлбэҕэ Дьокуускайга бастакы көхтөөх сааһырыы киинин тутар былаан баар.

VIII-с «Азия оҕолоро» Норуоттар икки ардыларынааҕы спортивнай оонньууларга бэлэмнэнии чэрчитинэн Оонньууларга тардыллар куорат бары оҕо спорт оскуолаларыгар өрөмүөн ыытыллар, маны сэргэ спорт бөдөҥ эбийиэктэригэр - «Юность», «Туймаада» стадионнар, «Дохсун», «Эллэй Боотур», «Триумф» спорт комплекстара, «Чолбон» бассейн - өрөмүөн ыытыллар.

«Спорт инфраструктуратын сайыннарыы спордунан уонна физическэй култууранан утумнаахтык дьарыктанар нэһилиэнньэ ахсаанын элбэтэригэр эрэнэбин», - диир баһылык Евгений Григорьев.

Көрсүһүү кэнниттэн спорт эйгэтин бэрэстэбиитэллэрэ босхо самбо секциятын элбэтэр, уулуссаҕа стадион, чэпчэки атлетика манеһа тутуллара наадатын, оҕо спорт оскуолаларыгар инвентарь тиийбэтин этиннилэр, маны сэргэ Владимировка оройуонугар сайыҥҥы спорт лааҕырын тэрийии эрчиллиилэри тохтоппокко ыытары хааччыйыа этэ диэн баҕа санааларын биллэрдилэр.