Евгений Григорьев Сэбиэскэй Аармыйа 50 сыла уулусса түөрт балаһалаах буолуоҕа диэтэ

Бэҕэһээ, от ыйын 31 күнүгэр, Евгений Григорьев «ВКонтакте» социальнай ситимҥэ ыыппыт быһа эпииригэр эһиилгиттэн Сэбиэскэй Аармыйа 50 сыла уулусса хапытаалынай өрөмүөнэ саҕаланыаҕа уонна уулусса түөрт балаһаҕа диэри кэҥэтиллиэҕэ диэтэ.
«Кэлэр 2024 сыл былааныгар Сэбиэскэй Аармыйа 50 сыла уулуссаны киллэрдибит. Уулусса Кальвица уулуссатыттан Бабушкин уулуссатыгар диэри кэрчигэ түөрт балаһаҕа диэри кэҥиэҕэ»,– диэтэ Евгений Григорьев.
Тутуу үлэтэ икки түһүмэҕинэн ыытыллыаҕа: бастакы түһүмэх – Кальвицаттан Бабушкин уулуссатыгар диэри кэрчик, иккис – Нам суолугар диэри. 
«Бүгүҥҥү күҥҥэ Бырабыыталыстыбаны уонна Тырааныспар уонна суол хаһаайыстыбатын министиэристибэтин кытта үбүлээһин боппуруоһун кэпсэтэбит»,– диэн бэлиэтээтэ баһылык.