Евгений Григорьев үп үлэһиттэрин кытта көрүстэ

Ааспыт 2022 сылга куорат бүддьүөтүн дохуоттаах чааһа сүрүннээн өрөспүүбүлүкэ бүддьүөтүттэн эбии үбүлээһин суотугар 34 % үрдээбит. Куорат бэйэтин дохуота 11 % эбиллибит. Бүддьүөт ороскуоттаах чааһа социальнай хайысхатын тутуспут. 
Ил Дархан Айсен Николаев өйөбүлүнэн, 2021 сыл балаҕан ыйын 8 күнүнээҕи «Саха Өрөспүүбүлүкэтин киин куората Дьокуускай куораты 2032 сылга диэри сайыннарыы туһунан» ыйааҕын олоххо киллэрии быһыытынан өрөспүүбүлүкэ бүддьүөтүттэн эбии үбүлээһин оҥоһуллан, киин куорат тиэргэннэрин хапытаалынай өрөмүөннээһин, саҥа оптуобустары атыылаһыы курдук киэҥ далааһыннаах үлэлэр олоххо киирдилэр. 
Дьокуускай куорат түөрт бөдөҥ федеральнай бырайыакка кыттыыта эмиэ куорат хаһаайыстыбаларын материальнай балаһыанньаларын тупсарыыга улахан төһүү. Ол курдук, аҥаардас «Куттала суох, хаачыстыбалаах суоллар» бырайыак көмөтүнэн бүгүҥҥү күҥҥэ куорат уулуссаларын 67 %-на ирдэбилгэ сөп түбэһэр турукка киирдэ. 2024 сылга диэри ити көрдөрүү 88, 85 % тиийэрэ күүтүллэр. 
Оттон үүммүт 2023 сылга киин куоракка үлэлиир үп тэрилтэлэрэ территориялары комплекснайдык сайыннарыы бырайыагар кытталларын туһугар дуогабардары түһэрсэр сорук турар. 
Евгений Григорьев итини сэргэ үптээх-харчылаах тэрилтэлэри «Победа» куорат аһымал пуондатын нөҥүө быстах байыаннай эпэрээссийэҕэ барбыттарга көмө оҥорорго көҕүлээтэ.
СӨ Национальнай баанын бэрэстэбиитэлэ муниципальнай табаары уонна өҥөнү уу харчыта суох төлөһөргө кирэдьиит тэрилтэлэрин кытта дуогабар түһэрсэр ньыма баарын бэлиэтээтэ, итини сэргэ оскуола оҕолорун уонна нэһилиэнньэ кырдьаҕас араҥатын үбү сатаан туһанарга үөрэтэр наадатын ыйда уонна көмөлөһөргө бэлэмнэрин эттэ.
Бэлиэтээн эттэххэ, көрсүһүүгэ РТС-тендер электроннай балаһааккаларын, Росэлторг, Татарстан өрөспүүбүлүкэтин судаарыстыбаннай сакааһыгар агентство, ТЭК-торг бэрэстэбиитэллэрэ кыттыыны ыллылар.