Евгений Григорьев: «Нэһилиэнньэ улаатар – ол аата биһиги куораппыт инникилээх»

Олунньу 15 күнүгэр куорат баһылыга Дьокуускайдааҕы килиэп кэмбинээтин үлэһиттэрин иннигэр отчуотугар Дьокуускай куорат дойду баһылыга Владимир Путин биһирэбилин ылбыт маастар-былаанынан сайдарын, Владимир Путин көҕүлээһининэн ыытыллар «Демография», «Үөрэхтээһин», «Куттала суох уонна хаачыстыбалаах суоллар», «Олорор дьиэ уонна куорат эйгэтэ», «Култуура» курдук биэс бөдөҥ национальнай бырайыак үлэлирин кэпсээтэ.
Баһылык урбаан тэрилтэтин үлэһиттэригэр куорат бүддьүөтэ 2023 сылга 30 млрд солк. тиийбитин, дохуоттаах чааһа 31 млрд солк. көрдөрбүтүн, ороскуот кээмэйэ 32 млрд солк. тэҥнэспитин, ол иһигэр куорат нолуоктан киирэр тус дохуота 11 млрд солк. буолбутун иһитиннэрдэ. 
«Куорат нэһилиэнньэтэ улаатар буоллаҕына, ол аата биһиги куораппыт кэскиллээх. Дьокуускай куорат нэһилиэнньэтэ аҥаардас кэлиҥҥи 5 сылга 47 тыһыынча киһинэн эбилиннэ. Оттон нэһилиэнньэ элбиирэ аһылык промышленнаһын кэҥэтэргэ, сайыннарарга көҕүлүүр, ол иһигэр килиэп бородууксуйатыгар наадыйыы үрдүүр», – диэтэ Евгений Григорьев.
Килиэп кэмбиннээтин үлэһиттэриттэн киирбит ыйытыылар кэмбинээт «Алгыс» НТО, Дзержинскэй уулуссатыгар киирэр суол наадатын, Бестужев-Марлинскай, 9/3 хаарбах дьиэ олохтоохторун көһөрүү, бөҕү тиэйии тарыыбын, сир учаастактарын тыырыы, «Тускул» түөлбэҕэ гааһы киллэрии, Өлүөнэ муостатын, оптуобус  тохтобулларын таблолара үлэлээбэттэрин тула буолла.