Евгений Григорьев: «Куораппыт былыргытыгар харыстабыллаах сыһыан маастар-былааҥҥа киирэ сылдьар»

«Былыргы Дьокуускай» («Якутск в былые годы») XIX-с үйэ бүтүүтүнээҕи – XX-с үйэ саҥатынааҕы Дьокуускай куорат хаартыскаларын быыстапката Бүтүн Арассыыйатааҕы история уонна култуура пааматынньыктарын харыстыыр уопсастыба «Илиҥҥи вектор» бырайыагын чэрчитинэн Дьокуускай куорат оскуолаларыгар туруоҕа.
Л.А. Колосова аатынан 33 №-дээх оскуолаҕа арыллыбыт бастакы маннык быыстапканы үөрүүлээхтик арыйыыга куорат баһылыга Евгений Григорьев Дьокуускай куорат былыргы көстүүтүгэр ытыктабыллаах, харыстабыллаах сыһыан 2030 сылга диэри олоххо киллэриллэр маастар-былааҥҥа киирэ сылдьарын, ол чэрчитинэн Залог оройуонугар «Кырдьаҕас куорат-2» комплекс тэриллиэхтээҕин бэлиэтээтэ.
«Былыргыбытын кытта билиһиннэрэр, былыргы мас тутууларбытын, историябытын көрдөрөр миэстэ Дьокуускайга хайаан даҕаны баар буолуохтаах. Биһиги дьолбутугар, 1883 сыллардааҕы, XIX үйэтээҕи дьиэлэр тыытыллыбакка ордон хаалбыт бүтүн кыбаарталлаахпыт, онон бу былааммытын олоххо киллэрэр кыахтаахпыт. Билигин ити дьиэлэри сэрэнэн чөлүгэр түһэрэн, туристарга көрдөрөр, кэпсиир миэстэлэниэхпит», – диэтэ Евгений Григорьев.

Л.А. Колосова аатынан 33 №-дээх оскуола дириэктэрэ Прокопий Батюшкин оҕолорго аҕыйах сылынан дойду баһылыга Владимир Путин өйөбүлүнэн олоххо киллэриллэр маастар-былаан көмөтүнэн саҥа, тупсубут, сайдыылаах Дьокуускай туоһулара буолуоххут диэтэ.
«Былыргы Дьокуускай» быыстапканы тэрийээччилэртэн уонна көҕүлээччилэртэн биирдэстэрэ Бүтүн Арассыыйатааҕы история уонна култуура пааматынньыктарын харыстыыр уопсастыба Саха сиринээҕи салаатын бэрэссэдээтэлэ Руслан Васильев оҕолорго, эбэлэрэ, эһэлэрэ хаампыт уулуссаларын, сылдьыбыт дьиэлэрин көрөн, историяҕа кыттыһар түгэни мүччү туппаттарыгар сүбэлээтэ. 
«Быыстапкаҕа турбут хас биирдии хаартыска көмөтүнэн куораппыт былыргытын сэгэтэн көрүөххүтүн баҕарабыт. Холобура, Киев куораты Арассыыйа куораттарын ийэлэрэ диэн ааттыыр буоллахтарына, биһиги Дьокуускайбытын Уһук Илин куораттарын аҕалаатар аҕалара диэххэ сөп. Тоҕо диэтэххэ Уһук Илин регионун 400 сыллаах үбүлүөйүн бэлиэтээһин биһигиттэн саҕаланыаҕа. Бастакы айанньыттар экспедициялара барыта чуолаан Дьокуускайтан аттаммыттара историябытын уонна пааматынньыктарбытын харыстыырга көҕүлүүр өссө биир төрүөт буолар»,– диэтэ Бүтүн Арассыыйатааҕы история уонна култуура пааматынньыктарын харыстыыр уопсастыба Дьокуускай куораттааҕы салаатын бэрэссэдээтэлэ Андрей Высоких.