Евгений Григорьев гражданнары приемнаата

Анал байыаннай эпэрээссийэ кыттыылааҕа баһылыкка олорор дьиэнэн хааччыйыы боппуруоһунан кэллэ. «Дьиэ-уот сыһыаннаһыыларыгар департамент» МХТ дириэктэрэ Евгения Пак итиннэ хоруйдаан, гражданин пропискалаах элбэх кыбартыыралаах дьиэтэ хаарбах туруктааҕынан билиниллибитин эттэ. Итинэн сибээстээн, саҥа дьиэҕэ көһүөхтэригэр диэри, быстах олорор пуондаҕа олорон эрэр кыах баарын иһитиннэрдэ. Баһылык департамеҥҥа өссө атын варианнары көрдүүргэ, итиэннэ Байыаннай дьайыы кыттыылаахтарын өйүүр куораттааҕы кииҥҥэ байыаннай сулууспалаахха юридическэй көмөнү оҥороругар сорудахтаата.

Байыаннай дьайыыга сырдык тыына быстыбыт байыаннай сулууспалаах ийэтэ Наталья А. охтубут буойуттарга Өйдөбүнньүк аллеятын оҥоруохха диэн этии киллэрдэ. Евгений Григорьев кутурҕанын биллэрэн туран, куорат салалтатын былааныгар итинник аллеяны Кыайыы пааркатыгар оҥоруу баар диэн иһитиннэрдэ. Итиэннэ баһылык Маҕан кылабыыһатыгар стелалаах  мемориальнай комплекс баар буолуоҕа, оттон куорат киинигэр анал байыаннай эпэрээссийэ кыттыылаахтарыгар пааматынньык туруоҕа диэн эттэ. Евгений Григорьев сорудаҕынан, өлбүт байыаннай сулууспалаах ийэтин ити эбийиэктэри олоххо киллэрии оробуочай бөлөҕүн састаабыгар киллэриэхтэрэ.

Дьокуускай олохтооҕо Валерий Слепцов сылгыһыкка анаммыт сквердээх историческай мемориальнай комплекс-паарка тутуутун туһунан этиитигэр хоруйдаан, куорат баһылыга Куораты тутуу уонна тырааныспар  инфраструктуратын департаменыгар, итиэннэ куорат кылаабынай архитектора Семен Сергеевка ипподром аттынааҕы сир учаастагын бырайыак былааныгар киллэрэллэригэр сорудахтаата.

Санатар буоллахха, куорат баһылыгын тус приемугар эрдэттэн суруттарыы ирдэниллэр. Олохтоох дьаһалта гражданнары уонна тэрилтэлэри кытта үлэлиир салаатыгар туох кыһалҕалааҕын ыйан туран сайабылыанньа суруйан туттарыллар. Сайабылыанньаҕа төлөпүөн нүөмэрин эбэтэр электроннай почтаны, олорор аадырыһы чопчу ыйыллар.

Сайабылыанньаны ыытыы көрүҥэ:

- yakutsk@sakha.ru официальнай электроннай почтаҕа;

- 40-80-76 төлөпүөнүнэн;

- почтовай аадырыска: Дьокуускай куорат, Ленина просп., 15;

- сайабылыанньаны Олохтоох дьаһалта гражданнары уонна тэрилтэлэри кытта үлэлиир салаатыгар аҕалан туттарыахха сөп, аадырыһа: Дьокуускай куорат, Ленина просп., 15, 113-с кэбиниэт, үлэ күнүгэр 9:00 чаастан 18:00 чааска диэри (эбиэт – 13:00 чаастан 14:00 чааска диэри).