Евгений Григорьев «Эхо столицы» уонна «Киин куорат» хаһыаттары үбүлүөйдэринэн эҕэрдэлээтэ

Ааспыт бээтинсэҕэ Дьокуускай куорат «Эхо столицы» уонна сахалыы тахсар «Киин куорат» хаһыаттара туһааннааҕынан 35 уонна 25 сылларын бэлиэтиир үөрүүлээх тэрээһин Гагарин аатынан Аныгы култуура уонна искусство дьиэтигэр буолан ааста.

Бэлиэ күнүнэн эрэдээксийэлэр бэтэрээннэрин, бүгүҥҥү айар кэлэктииби куорат баһылыга Евгений Григорьев эҕэрдэлээтэ.

Евгений Григорьев икки судаарыстыбаннай тылынан тэҥинэн тахсар куорат хаһыаттара Олохтоох дьаһалта үлэтин-хамнаһын сырдатыыга ураты оруолларын тоһоҕолоото. Эрэдээксийэлэр бу сыллар тухары өрөспүүбүлүкэ киин куоратын олоҕун-дьаһаҕын, куорат хаһаайыстыбаларын үлэлэрин-хамнастарын, экономическай туруктарын туһунан тиһигин быспакка сырдатан кэлбиттэрин, маны сэргэ култуура, спорт, чөл олох, история туһунан матырыйааллар ааҕааччы сэҥээриитинэн туһаналларын бэлиэтээтэ.

«Биһиги хаһыаттарбыт информацияны бүгүн хас да көрүҥүнэн тарҕаталлар. Ол иһигэр «Эхо столицы» хаһыат саайтыгар киирэн, архыыбы кытта билсиһиэххэ, холобура, 10 сыл аннараа өттүгэр суруналыыстар тугу суруйбуттарын ааҕыахха сөп», - диэтэ Евгений Николаевич уонна «Эхо столицы» уонна «Киин куорат» хаһыаттар эрэдээксийэлэригэр салгыы сайдыыны, интэриэһинэй бырайыактары баҕарда.

Бу күн баһылык суруналыыстарга Олохтоох дьаһалта аатыттан Бочуотунай грамоталары, Махтал суруктары туттарда.

Урукку сылларга үлэлээн ааспыт «Эхо недели» бастакы эрэдээктэрэ Петр Гуляев, Ирина Пантелеева, Олег Емельянов, Людмила Левина о.д.а. тустарынан сылаас тылларынан ахтыы буолла, бэйэлэрин эҕэрдэлэрин араас сылларга эрэдээктэрдээбит Андрей Петров, Евгений Грибчатов, «Киин куорат» хаһыаты төрүттээччилэртэн биирдэстэрэ, «Дьокуускай куорат сайдыытыгар кылаатын иһин» анал бэлиэ хаһаайына Прокопий Чуукаар о.д.а.  эттилэр.