Евгений Григорьев «Азия оҕолорун» эбийиэктэрин өрөмүөнүн хаамыытын билистэ

Куорат баһылыга Евгений Григорьев VIII-с «Азия оҕолоро» оонньууларга бэлэм буолуохтаах 1 №-дээх ДЮСШ уонна «Стерх» спорт комплексын өрөмүөннэрин кытта билистэ.
Евгений Григорьев бэлиэтээбитинэн, «Азия оҕолоро» Оонньуулартан тутулуга суох бу сайын куорат бары ДЮСШларыгар өрөмүөн ыытыллыахтаах.
«Быйыл Оҕо спорт оскуолаларыгар барыларыгар өрөмүөн ыытыллар. Олортон сорохторо VIII-с «Азия оҕолоро» Оонньууларга үлэлиэхтэрэ. Холобура, «Стерх» спорт комплексыгар уолаттар волейболлара ыытыллара былааннанар. Бу эбийиэккэ кырааска үлэтэ, сарай, санузел, инженернэй коммуникациялар өрөмүөннэрэ ыытыллар. Манна даҕатан эттэххэ, кыргыттар волейболлара Ильменскэй уулуссаҕа тутулла турар саҥа комплекса буолуоҕа», – диэтэ Евгений Григорьев.
Санатар буолахха, чуолаан «Азия оҕолоро» оонньуулары көрсө Дьокуускайга Сайсары уокуругар уонна Хатас нэһилиэгэр икки саҥа эбийиэк баар буолла. Маны сэргэ 14 урукку эбийиэккэ өрөмүөн ыытыллар – «Кыайыы 50 сыла», «Триумф», «Дохсун», «Эллэй Боотур», «Чолбон», «Самородок», «Модун», «Н.Н. Тарскай аатынан «Туймаада», Р.М. Дмитриев аатынан Олимпийскай эрэл училищета о.д.а.
Оттон быйылгы «Азия оҕолоро» Оонньууларга 14 тас дойду уонна Арассыыйа 5 регионун ыччаттара спорт 24 көрүҥэр күөн көрсүөхтэрэ, диэн иһитиннэрэр Олохтоох дьаһалта пресс-сулуспата.