Евгений Григорьев анал байыаннай дьайыы кыттыылааҕын дьиэ кэргэнигэр субуотунньукка кыттыыны ылла
Куорат баһылыга Евгений Григорьев көҕүлээһининэн чааһынай дьиэлээх анал байыаннай дьайыы кыттыылаахтарын тиэргэннэрин хаарын тиэйиигэ субуотунньуктар буола тураллар.
Баһылык тус бэйэтинэн Сайсары уокуругар ыытыллыбыт субуотунньукка кыттыыны ылла. Субуотунньукка уокурук салайааччыта Владимир Слепцов, управа эр дьоно бары, икки погрузчик уонна икки самосвал массыына үлэлээннэр, тиэргэн хаара бүтүннүү тиэйилиннэ.
Анал байыаннай дьайыы кыттыылааҕын ийэтэ Марианна Портнягина куорат уонна уокурук салалталарыгар көмөлөрүн уонна тиһиктээх өйөбүллэрин иһин махтанна.
Евгений Григорьев бэлиэтээбитинэн, Анал байыаннай дьайыы кыттыылаахтарын өйүүр кииҥҥэ күннэтэ араас хабааннаах көрдөһүүлэр киирэллэр.
«Бу кэм устата киирбит 10 тыһыынча кэриҥэ көрдөһүүгэ, кыратыттан-улаханыттан тутулуга суох, барытыгар көмөлөһө сатыыбыт. Анал байыаннай дьайыы кыттыылаахтарыгар уонна кинилэр дьиэ кэргэннэригэр өйөбүл ураты хонтуруолга турар», - диэтэ куорат баһылыга. Ол туһунан Олохтоох дьаһалта пресс-сулууспата иһитиннэрэр.
Сонуннар
Ордук ааҕаллар
