Евгений Григорьев 2023 сыллааҕы үлэнэн АГАТУ устудьуоннарын иннигэр отчуоттаата

Бу нэдиэлэҕэ куорат баһылыга Евгений Григорьев Олохтоох дьаһалта 2023 сыллааҕы үлэтин туһунан АГАТУ устудьуоннарын уонна преподавателлэрин иннигэр отчуоттаата. 
Баһылык Дьокуускай куорат 2030 сылга диэри маастар-былаана үөрэхтээһин, култуура, спорт, ОДьКХ эйгэлэрин сайыннарыыга сүрүн тирэх буоларын бэлиэтээтэ. Маны сэргэ маастар-былаан инвестицияны оҥорууга, ас-үөл өттүнэн куттал суох буолуутун хааччыныыга, инфраструктураны сайыннарыыга, саҥа уопсастыбаннай туоналары тэрийиигэ дьоһун акылаат буолар аналлааҕын санатта. 
«Маастар-былаан биһиэхэ саҥа социальнай эбийиэктэри, оскуолалары, уһуйааннары, култуура кииннэрин, спорт комплекстарын тутар, суолларбытын өрөмүөннүүр, уопсастыбаннай тырааныспары тупсарар кыаҕы биэрэр. Бу барыта нэһилиэнньэ олоҕун хаачыстыбатын үрдэтэр аналлаах», - диэтэ Евгений Григорьев.
Баһылык отчуотун кэнниттэн үөрэхтэрин бүтэрдэхтэринэ Дьокуускай куоракка үлэлии хаалар былааннаах устудьуоннар 2030 сылга диэри ханнык эбийиэктэр тутуллуохтарын интэриэһиргээтилэр. Ыччат дьону ордук бэлисипиэт суоллара баар буолуохтара, орто анал үөрэх кыһаларыгар Суперкампус, Култуура уонна сынньалаҥ пааркатыгар аквапаарка баар буолуохтааҕын сэргии иһиттилэр.
Агротехническэй факультет декана Андрей Сидоров Дьокуускай куорат баһылыгынан Евгений Григорьев талыллыаҕыттан уулусса-суол ситимин өрөмүөнүгэр күүстээх үлэ барарын бэлиэтээтэ. «Өтөрүнэн маннык киэҥ далааһыннаах үлэ ыытылла илигэ, тиэргэннэр өрөмүөннэрэ кытта барар. Ыраата барбакка эттэххэ, Сэргэлээх шоссетын, 1 тиэргэнэ өрөмүөн кэнниттэн киһи билбэт гына уларыйда», - диэтэ кини. 
Көрсүһүү кэнниттэн устудьуоннар уонна преподавателлэр Евгений Григорьевка салгыы таһаарыылаах үлэни баҕардылар.