Этэҥҥэ эргиллэн кэллиннэр

 “Суол-иис мөлтөҕүнэн мобилизацияламмыт дьону барыларын Дьокуускайга аҕала охсон Илиҥҥи байыаннай уокурук чаастарыгар кэмигэр ыытан иһии кыаллыбат. Ол иһин военкоматтар былааннаммыт үлэни ыыта олороллор. Мобилизация былаана үрдүү илик”, - диэн быһаарар военком А. Авдонин. 
Бу билигин буола турар быһыыны-майгыны араастык ылыныахха, сыаналыахха сөп. Ким эрэ утарар, ким эрэ өйүүр... Ол эрэн байыаннай дьайыыга ыҥырыллан барбыт уолаттарбытыгар төһө кыайарбытынан көмөлөһөрбүт, өйүүрбүт сөп. Этэҥҥэ бары эргиллэн кэлиэхтэрин наада.

Алдан оҕолоро байыаннай дьайыыга сылдьар дьоҥҥо аккырыыккалары уонна харысхаллары оҥорон ыыттылар. Алданнар саллааттары хомуйар пууҥҥа таҥара дьиэтиттэн “иитиллибит” иконалары аҕалан туттараллар. 

Дьокуускай уокуруктара эмиэ байыаннай дьайыыга ыҥырыллыбыттарга көмөнү хомуйууну тэрийэллэр. Ол курдук, Сайсары уокуругун дьахталлара сылаас наскылары баайан эрэллэр. 

"Айар" кинигэ кыһата бүгүҥҥү быһыыга-майгыга бэйэтин кылаатын киллэрэн, "Эр хоһуун буол!" диэн олох очурдарыттан, араас моһоллоруттан харыстыыр, куту-сүрү бөҕөргөтөр алгыстардаах, хоһооннордоох харысхал-кинигэ таһаарда.

“Якутия с тобой” көмө ыстаабыгар тэриллибит иистэнэр сыахха дьахталлар түмсэн номнуо тыһыынчаттан тахса малы-салы, таҥаһы-сабы тиктилэр. Кинилэр худи, араас чехол, үрүсээк, утуйар мөһөөччүк, кээнчэ тигэллэр. Волонтер иистэнньэҥнэр үксүлэрэ 50-нарыттан тахсыбыт үтүө санаалаах кэрэ аҥаардар. Кинилэр бары сүрэх ыйыытынан, уолаттарыгар тугунан эмэ көмөлөһөр баҕанан сирдэтинэн кэлэллэр. 

ХИФУ устудьуоннара “Сахабулт” концерны кытта 50 байыаннай аптечка тиктилэр. Пединститут технологияҕа кафедратыттан практикаларын бара сылдьар устудьуоннар көмө аахсыйаҕа кыттыһан, өссө да иистэнэр былааннаахтар.
 Маны таһынан ХИФУ-га ичигэс таҥаһы хомуйар аахсыйаны биллэрбиттэр: тобукка, тоҥолоххо кэтиллэр харыстыыр таҥастары, балаклавалары, сылаас угунньалары хомуйаллар. 
Аадырыстара: Кулаковскай уул., 42/3, 9/2 уопсай (“Вышка” кафе аанынан киирэҕит), төлөпүөннэрэ: +7 (964) 077-75-00; 15:00 - 18:00 ч, бэнидиэнньик-субуота үлэлииллэр.

Мобилизация биллэриллиэҕиттэн өрөспүүбүлүкэ таһымыгар олохтоммут көмө:
— биирдэ бэриллэр 200 тыһ. солк. көмө харчы;
— уһуйаан төлөбүрүттэн босхолонуу (аҕалара байыаннай дьайыыга сылдьар кэмигэр эрэ көрүллэр);
— 5-11 кылаас оҕолорун оскуолаҕа босхо итии аһылыгынан хааччыйаллар;
— 6,5-18 саастаах оҕолорго лааҕырдарга босхо путевка;
— байыаннай дьайыыга сылдьар дьон оҕолоро орто уонна үрдүк үөрэх кыһаларыгар тус сыаллаах миэстэлэргэ үөрэххэ босхо киирэллэр;
— устудьуоннарга үрдэтиллибит истипиэндьийэ олохтонор;
мобилизацияламмыт киһи төрөппүттэригэр санаторийдарга босхо путевка көрүллэр