19.03.2022 | 16:00

Эт курдук «эриллиэхпитин» баҕарбаппыт!

Эт курдук «эриллиэхпитин» баҕарбаппыт!
Ааптар: Айыына Ксенофонтова
Бөлөххө киир

Кэнники кэмҥэ куорат олохтоохторо уопсастыбаннай тырааныспар сырыыта мөлтөөтө диэн үҥсэллэрэ элбээтэ. Оптуобус аҕыйах, өр күүтэбит. Оскуолаҕа, үлэбитигэр хойутуубут. Анньыһыы, үтүрүһүү. Ыга симиллэн, тууһаммыт балык курдук айанныыбыт. Баттахпытына баһыыба курдук. Эт курдук “эриллэбит” диэччилэр эмиэ бааллар. Ити омун буолбатах, баар кыһалҕа.

Кыһалҕаны быһаара сатаан

Олохтоох дьаһалта иһитиннэрбитинэн, бу быһыы-майгы куорат бары маршруттарыгар көстөр. Оптуобустар техническэй көрүүлэрин болдьоҕо бүтэн эрэр, оттон Дьокуускайга биир эрэ анал пуун үлэлиир, ол иһин итинник уочарат тахсар диэн быһаарар. Манна даҕатан эттэххэ, ГИБДД управлениетыгар уопсастыбаннай тырааныспары инники аһардар туһунан сурук ыытыллыбыт. Аны туран, коронавирус содулуттан куорат бары маршруттарыгар суоппар тиийбэтэ – туспа кыһалҕа.

Ленин проспегар хапытаалынай өрөмүөн ыытылларынан үгүс оптуобус сэргэстэһэ сытар уулуссаларынан сылдьаллар, үлэҕэ барыыга-кэлиигэ хаайтарыы тахсар.  

Соторутааҕыта мээр Евгений Григорьев куорат маршруттарыгар “ЯПАК”  тэрилтэ суоппардарын эбии кытыарарга соруйбута, онон D категориялаахтары үлэҕэ ыҥыраллар. “ЯПАК” дириэктэрэ Валерий Домотов куорат таһыгар сылдьар оптуобустар маршруттарын уларытар туһунан этии киллэрбитэ. Онон дьаһалта кыһалҕаны быһаарар үлэни ыытар.

Киин куорат баһылыга Евгений Григорьев уопсастыбаннай тырааныспарга туох уларыйыы киирбитин нэһилиэнньэҕэ иһитиннэрдэ:  

– Кулун тутар 14 күнүттэн 108 №-дээх маршрут оптуобуһа элбээтэ, сылдьар схемата уларыйда. Ол курдук, Пригороднайтан өрүс пуордугар диэри айанныыр: Автодорожнай, Ойуунускай, Поярков уулуссаларынан, салгыы 203 уонна 202-с микрооройуоннарынан ааһар. Бу маршрутунан “Прометей”, 202-с, 203-с микрооройуоннар куорат киинигэр сылдьар кыахтаныахтара, оччоҕо 3, 4, 8, 14, 17, 18, 20 №-дээх оптуобустарга дьон тоҕуоруһуута аҕыйыаҕа.

102 №-дээх маршрут сылдьар схемата уларыйда: оптуобус аэропортан Курнатовскай уулуссатынан, 2-с Борисовканан, Окружной шоссенан ааһан, Дзержинскэй уулуссатыгар тахсар. Онон Гагаринскай уокурук олохтоохторо куорат киинигэр сылдьыахтара, 2, 3, 5, 25 №-дээх оптуобустарга тоҕуоруһуу аҕыйыаҕа. 

101 уонна 103 №-дээх маршруттар кэнники кэмҥэ Автодорожнай уулуссанан сылдьаллар, бу ДСК уонна Прометей олохтоохторугар табыгастаах.

Бу этиллибит маршруттар сырыылара “Умный транспорт” сыһыарыыга көстөр, дьон онон сирдэтинэн, айаннарын холкутук былаанныахтарын сөп. Ону сэргэ, каартанан төлөбүрү ылыы систиэмэтэ сааһыланна. 

 

Альбина Кычкина, СӨ предпринимателлэрин бырааптарын көмүскүүр боломуочунай:

– Кулун тутар 7 күнүгэр  бу иннинэ куоракка соҕотох үлэлии турбут “Автоград” ХЭТ аккредитациятын болдьоҕо бүтэн, маннык уустук быһыы-майгы таҕыста. 190 оптуобус техническэй көрүүгэ уочарата хаалбыт. Онон оптуобустар графиктарын тутуспаттарын туһунан үҥсүү киирэрэ элбээбит.

“Российский Союз Автостраховщиков” тэрилтэни кытта “Автоград” ХЭТ аккредитациятын уһатар уонна Дьокуускай атын техническэй көрүү пууннарыттан сайаапкалары түргэтэтэр үлэни ыыттыбыт.

Ону сэргэ, кулун тутар 14 күнүттэн “Первая Лига” ХЭТ аккредитацияны ылла, онон техническэй көрүүнү ыытар кыахтанна. Бу станция кулун тутар 15 күнүттэн Автодорожнай уул., 59/7, үлэлиир.

Сонуннар

Ордук ааҕаллар

Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
Сардаана Токоемова:  «Иистэн дуоһуйууну ылабын...»
Дьон | 28.01.2023 | 16:00
Сардаана Токоемова: «Иистэн дуоһуйууну ылабын...»
Иис сахаларга урут-уруккуттан хааммытыгар баар. Билигин биһиги ортобутугар талааннаах иистэнньэҥнэр, норуот маастардара аҕыйаҕа суохтар. Кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, туостан көбүөрдэри, сэлээппэлэри, халадаай былаачыйалары, оноолоох соннору, хаһыаччыктары о.д.а. саха дьахталлара ис сүрэхтэриттэн тигэллэр. Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр....
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Куорат олоҕо | 01.02.2023 | 17:00
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Дьокуускай куорат историятыгар аан бастаан 990 миэстэлээх улахан оскуола аны күһүн үлэҕэ киириэхтээх.  990 миэстэ диэн бырайыактаммытынан уйунар кыаҕа буоларын өйдүөххэ наада. Киин куораппытыгар миэстэ тиийбэт кыһалҕата баарын тухары оскуолаларбыт 2-3 төгүл ноҕоруускалаах, иккилии симиэнэнэн үлэлии олоруохтара турдаҕа. Онон бу саҥа оскуолаҕа балтараа тыһыынчаҕа тиийэ оҕо үөрэнэрэ буолуо диэн барыллаан...
Көмө мүнүүтэ да тохтообот
Дьон | 03.02.2023 | 12:00
Көмө мүнүүтэ да тохтообот
Аҕа дойду Улуу сэриитин кэмигэр Саха сирин дьоно-сэргэтэ төһө да тыһыынчанан килэмиэтиринэн ыраах олордоллор, өйдөрө-санаалара Кыайыы эрэ туһугар сытара. Биир дойдулаахтарбыт харчынан, облигациянан, үрүҥ көмүһүнэн, кыһыл көмүһүнэн, балыгынан, күндү түүлээҕинэн о.д.а. көмөнү хара көлөһүннэрин тоҕон туран фроҥҥа ыыппыттара. Ийэлэрбит, эбэлэрбит ыарахан үлэлэрин быыһыгар төһөлөөх кээнчэни, үтүлүгү тигэн ыыппыттарай! Дэлэҕэ сэрии...