Эриэккэс идэ — МУЗЕОЛОГ

Саха сириттэн тахсыбакка эриэккэс уонна сэдэх идэлэргэ үөрэниэххэ сөп.

Быйыл Арктикатааҕы култуура уонна искусство судаарыстыбаннай института “Музеология и охрана объектов культурного и природного наследия” диэн салааҕа үөрэммит бастакы выпускниктарын таһаарар.

АГИКИ Библиотечнай-информационнай уонна гуманитарнай диссипилиинэлэр кафедраларыгар кэпсээбиттэринэн, кэнники сылларга музей дьыалатын сайдыыта Арассыыйаҕа балысханнык баран эрэр – норуоттар култуураларын, айылҕа сыаннастарын харайыыга аныгылыы сыыппара технологиялара киирэ тураллар, мультимедийнай экспозициялар тэриллэр буоллулар, цифровой гидтэр үлэлииллэр, онон музей үлэһитэ аныгы кэм ирдэбиллэригэр эппиэттиир кыахтаах буолара ирдэнэр. Холобур, “Арассыыйа – мин историям” музей комплекс үлэтин ылан көрүҥ, эбэтэр Национальнай художественнай музей сыыппара экспозицияларын – манна барытыгар аныгы үйэ идэлээхтэрэ үлэлииллэр.

Кафедраҕа бэлиэтээбиттэринэн, билигин дойду иһинээҕи туризм сайда турар бириэмэтигэр музейдарга сылдьыы элбии турар, оттон музейдар аныгы тэтимнээх олох ирдэбилигэр эппиэттиир буолуохтаахтар, цифровой модернизацияны ыытарга эдэр исписэлиистэргэ наадыйыахтара.

АГИКИ музей үлэһиттэрин бэлэмнииригэр сүрүннээн арктическай регионоведениеҕа болҕомтотун уурар эбит. Манна үөрэнэ киирбит устудьуон Арктика норуоттарын култууратын уонна искусствотын, арктическай циркумполярнай цивилизацияны, ол иһигэр материальнай култуураны эмиэ үөрэтэр. Билиилэрин кэлин коллекциялары оҥорорго, экскурсиялары ыытарга туһаналлар.

Арктика Арассыыйа инникилээх регионунан ааҕыллар, регион олоҕун билиһиннэрэр, ыраах айаннаабакка атын сиртэн көрдөрөр экспозициялаах музейдары аан дойду дьоно сэҥээрэр. 

Урут эдэр дьон музей үлэһитин күннээҕи дьарыга чуҥкук, уу чуумпу музейга ааһар эрэ дии саныыр буоллахтарына, билигин чыҥха атын. Музей үлэһиттэрин бэлэмниир кафедраҕа кэпсээбиттэринэн,  музей үлэһитэ детектив үлэтигэр маарынныыр, ол курдук, исписэлиис экспонаты кыырпаҕынан хомуйан таһаарар, төрдүн-төбөтүн детектив курдук көрдөөн булар. Оттон мультимедийнай быыстапкалары, экспозициялары тэрийии IT-технологиялары уонна цифровой дизайны баһылыыры ирдиир. Онон МУЗЕОЛОГ – креативнай ыччат талар идэтэ.

Аадырыстара: 677000, Дьокуускай к., Орджоникидзе уул., 4

Төлөпүөннэрэ:  

+7(411)234-4460

Электроннай почталара:  agiki@mail.ru

Сайт: https://agiki.ru