Эргиэн үлэһиттэрин чиэстээтилэр

От ыйын 26 күнүгэр Олохтоох дьаһалтаҕа Арассыыйаҕа эргиэн үлэһитин күнүнэн бу эйгэ бастыҥнарын чиэстээтилэр. 
Идэ бэрэстэбиитэллэрин куорат баһылыгын солбуйааччы Владимир Дорожкин, Куорат дууматын бэрэссэдээтэлин эбээһинэһин толорооччу Евдокия Евсикова уонна СӨ эргиэҥҥэ, урбааҥҥа уонна туризм сайдыытыгар миниистирин солбуйааччы Мария Карпова эҕэрдэлээтилэр.
Куорат баһылыгын солбуйааччы Владимир Дорожкин бэлиэтээбитинэн, эргиэн эйгэтэ урбааны, туризмы, сынньалаҥы, инвестицияны кытта быһаччы ситимнээх. 
Бу күн бастыҥ үлэһиттэр уонна эйгэ бэтэрээннэрэ куорат баһылыгын грамотатынан, түөскэ иилиллэр бэлиэнэн, Олохтоох дьаһалта бочуоттаах грамоталарынан, махтал суруктарынан бэлиэтэннилэр. 
Санатар буоллахха, Арассыыйаҕа 2013 сылтан дойду баһылыга Владимир Путин ыйааҕынан от ыйын төрдүс субуотатыгар Эргиэн үлэһитин күнэ бэлиэтэнэр. 
Дьокуускай куорат социальнай-экономическай сайдыытыгар  – социальнай бигэ туруктаах буолууга, куорат бүддьүөтүн дохуота улаатарыгар, инфраструктураны сайыннарыыга, саҥа үлэ миэстэлэрин таһаарыыга – эргиэн салаата сүҥкэн оруоллаах, диэн иһитиннэрэр Олохтоох дьаһалта пресс-сулууспата.